နော်ဝေနိုင်ငံရဲ့အကြီးဆုံးပင်စင်ရံပုံငွေကုမ္ပဏီ KLP ဟာ  မြန်မာပြည်မှာ ရင်းနှီးမြှုပ်နှံလုပ်ကိုင်နေတဲ့ အထူးစီးပွားရေးဇုန်စီမံကိန်းနဲ့ Adani ဆိပ်ကမ်းတွေကနေ နုတ်ထွက်လိုက်တယ်လို့  KLP ကုမ္ပဏီက ရိုက်တာသတင်းဌာနကို ပြောပါတယ်။ 

အိန္ဒိယနိုင်ငံရဲ့ အကြီးဆုံး ဆိပ်ကမ်းလုပ်ငန်း Adani Ports ဟာ မြန်မာစစ်တပ်ပိုင် လုပ်ငန်းစုတခုဆီကနေ မြေငှားရမ်းပြီး ရန်ကုန်မြို့မှာ ကွန်တိန်နာဆိပ်ကမ်း တည်ဆောက်မယ့်စီမံကိန်းအပေါ် နိုင်ငံတကာ ရင်းနှီးမြှုပ်နှံသူတွေရဲ့ စိစစ်မှုကို ခံ‌နေရပါတယ်။

မြန်မာနိုင်ငံက Adani ရဲ့လုပ်ငန်းတွေဟာ မြန်မာလက်နက်ကိုင်စစ်တပ်နဲ့ စီးပွားမိတ်ဖက်ဖြစ်နေတာဟာ  KLP ရဲ့ရင်းနှီးမြှုပ်နှံမှုဆိုင်ရာ လမ်းညွှန်ချက်တွေကို ချိုးဖောက်ရာရောက်တဲ့အတွက်  လက်မခံနိုင်စရာဖြစ်တယ်လို့   KLP ကုမ္ပဏီက ရိုက်တာသတင်းဌာနကို ပေးပို့တဲ့ထုတ်ပြန်ချက်ထဲမှာ ပြောပါတယ်။ 

ကွန်တိန်နာဆိပ်ကမ်းကို မြန်မာစစ်တပ်ပိုင်မြေပေါ်မှာ တည်ဆောက်နေဆဲဖြစ်ပြီး၊ အဲဒါဟာ စစ်တပ်အတွက် လက်နက်ခဲယမ်းတွေနဲ့ ပစ္စည်းကိရိယာတွေ တင်သွင်းတာ ဒါမှမဟုတ် ရေတပ်အခြေစိုက်စခန်းတွေကို တင်ပို့ရာမှာ အသုံးပြုနိုင်တဲ့ မလွဲမသွေ အန္တရာယ်တခု ဖြစ်လာနိုင်တာကြောင့် ခုလိုနုတ်ထွက်လိုက်တာလို့ ဆိုပါတယ်။ 

နော်ဝေနိုင်ငံရဲ့ အကြီးဆုံးပင်စင်ရံပုံငွေ ကုမ္ပဏီ KLP အနေနဲ့ Adani ဆိပ်ကမ်းတွေမှာ ထည့်ဝင်ထားတဲ့ ရင်းနှီးမြှုပ်နှံမှုက နော်ဝေငွေကြေး ခရိုနာ ၉ သန်း တန်ဖိုး ရှိပါတယ်။

မေလတုန်းကတော့ Adani Ports ဟာ အမေရိကန်ပြည်ထောင်စုက ချမှတ်ထားတဲ့ ပိတ်ဆို့မှုတွေကို ချိုးဖောက်တယ်လို့ တွေ့ရှိရရင် မြန်မာကွန်တိန်နာ ဆိပ်ကမ်း စီမံကိန်းကိုစွန့်လွှတ်နိုင်ကြောင်းနဲ့ ရင်းနှီးမြှုပ်နှံမှုကိုလည်း လျှော့ချသွားမှာဖြစ်ကြောင်း ပြောဆိုခဲ့ပါတယ်။ 

ဖေဖော်ဝါရီ ၁ ရက်မှာ မြန်မာစစ်တပ်က အာဏာသိမ်းမှု ကျူးလွန်ခဲ့ပြီး လူပေါင်းရာချီ အသတ်ခံခဲ့ရတဲ့ လူထုဆန္ဒပြပွဲတွေကို ဖြိုခွင်းမှုကြောင့် နိုင်ငံတကာ ပြစ်တင်ရှုံ့ချမှုတွေနဲ့ စစ်တပ်က တာဝန်ရှိသူတွေ၊ စစ်တပ်ထိန်းချုပ်တဲ့ အဖွဲ့အစည်းတွေအပေါ် အရေးယူပိတ်ဆို့ ဒဏ်ခတ်နေ ကြတာပါ။