မန္တလေးတိုင်း၊ ပြင်ဦးလွင်မြို့မှာ ဇူလိုင် ၉ ရက်ည ၈ နာရီမှ ဇူလိုင် ၁၀ ရက် ည ၈ နာရီအတွင်း    ကိုဗစ်-၁၉ ပိုးတွေ့ရှိသူ ၃၇ ဦး၊ သေဆုံးသူ  ၂ ဦးရှိတယ်လို့ စစ်ကောင်စီ ကျန်းမာရေးနဲ့ အားကစားဝန်ကြီးဌာနက  မနေ့ညက ထုတ်ပြန်ပါတယ်။  

မြို့ခံပရဟိတအသင်းရဲ့ အချက်အလက်အရတော့  ဇူလိုင် ၁ ရက် မှ ၁၀ ရက်အထိ  ကိုဗစ်-၁၉ ပိုးတွေ့ရှိသူ  ၂၈၄  ဦး ရှိပြီး သေဆုံးသူ  ၁၃ ဦး ရှိတယ်လို့ သိရပါတယ်။ 

ဇူလိုင်လ ပထမပတ် ၁၀ ရက်အတွင်း ပြင်ဦးလွင် ခုတင် (၃၀၀) ဆေးရုံ Isolation Ward မှ ရောဂါသက်သာလို့ ဆေးရုံဆင်းခွင့်ရရှိသူ ၃၃ ဦး ရှိပါတယ်။ 

ဇူလိုင် ၁ ရက်မှ ၁၀ ရက်အထိ ကိုဗစ်ရောဂါနဲ့ သေဆုံးသူတွေကတော့  အသက် ၂၅ နှစ်မှ ၈၁ နှစ်အရွယ်တွေဖြစ်ပြီး  သေဆုံးသူ အများစုမှာ အသက် ၄၆ နှစ်အထက် အရွယ်လူကြီးတွေ ဖြစ်ပါတယ်။

ဇူလိုင် ၁၁ ရက် ညနေပိုင်းထိ ကိုဗစ်အတည်ပြုလူနာ ၄ ဦး  သေဆုံးခဲ့ရာ ပြင်ဦးလွင်နာရေးကူညီရေးအသင်းက ၈ မိုင်သုသာန်သို့  ကူညီပို့ဆောင်သင်္ဂြိုဟ်ခဲ့ပါတယ်။  ဖော်ပြထားတဲ့ သေဆုံးသူအရေအတွက်ဟာ  မြို့ခံပရဟိတအသင်းတစ်ချို့ ကူညီဆောင်ရွက်ပေးခဲ့တဲ့ အချက်အလက်တွေသာ ဖြစ်ပြီး  စာရင်းမသိရှိရဘဲ ကိုဗစ်ကြောင့်သေဆုံးသူတွေလည်း  ရှိနိုင်ပါတယ်။ 

ရပ်ကွက်အတွင်း အပြင်ဆေးခန်းပြပြီး ကြိတ်ကုနေတာတွေရှိနေပြီး ကိုဗစ်ရောဂါ သံသယနဲ့ သေဆုံးသူတွေလည်း  များစွာ ရှိနေပါတယ်။ 

မန္တလေးတိုင်းတစ်ခုလုံးမှာတော့  ဇူလိုင် ၉ ရက်ည ၈ နာရီမှ ဇူလိုင် ၁၀ ရက် ည ၈ နာရီအတွင်း ကိုဗစ်-၁၉ ရောဂါ ဓာတ်ခွဲအတည်ပြုလူနာ  ၁၇၅ ဦးနဲ့ သေဆုံးသူ ၁၂ ဦးရှိတယ်လို့ စစ်ကောင်စီက ထုတ်ပြန်ထားပါတယ်။  

Photo - ပြင်ဦးလွင်နာရေးကူညီရေးအသင်း