ကာကွယ်ဆေးထိုးဖို့ တွန့်ဆုတ်နေတာဟာ အနာဂတ်မှာ လက်ရှိ ကာကွယ်ဆေးတွေကို ခံနိုင်ရည်ရှိတဲ့ ကိုဗစ်ဗီဇမျိုးကွဲတွေ ပိုတိုးလာဖို့ ဦးတည်စေနိုင်တယ်လို့ အမေရိကန်နိုင်ငံလုံးဆိုင်ရာ ဓာတ်မတည့်မှုနဲ့ ကူးစက်ရောဂါဌာန ညွှန်ကြားရေးမှူး ဒေါက်တာအန်ထော်နီဖောင်စီက သြဂုတ် ၈ ရက်မှာ သတိပေးလိုက်ပါတယ်။

“တကယ်လို့ ခင်ဗျားဟာ ဗိုင်းရပ်စ်ကို ဗီဇဆက်ပြောင်းဖို့ အခွင့်အရေးပေးလိုက်တယ်ဆိုရင် ကာကွယ်ဆေးမထိုးထားတဲ့လူတွေကိုသာမက ကာကွယ်ဆေးထိုးထားပြီးသား လူတွေအပေါ်ကိုပါ သက်ရောက်နိုင်တဲ့ ပိုဆိုးတဲ့ ဗီဇမျိုးကွဲ ကူးစက်တာခံရဖို့ ဦးတည်နေပြီ။ ဘာလို့လဲ ဆိုတော့ ဗီဇမျိုးကွဲဟာ ကာကွယ်ဆေးရဲ့ ကာကွယ်နိုင်စွမ်းကို ရှောင်ထွက်နိုင်တယ်”လို့ ဖောင်စီက NBC သတင်းဌာနရဲ့ ‘Meet the Press’ အစီအစဉ်ကို ပြောပါတယ်။

ကာကွယ်ဆေး မထိုးလို့ အရင်က ကိုဗစ်-၁၉ ကပ်ရောဂါ ကူးစက်ခံပြီးသား လူတွေဟာ နောက်ထပ် ဘယ်လို ဗီဇမျိုးကွဲ ထပ်ကူးစက်တာကိုမဆို ခံနိုင်ရည် အင်အားနည်းနေဆဲပဲလို့လည်း ဖောင်စီက ပြောပါတယ်။

အမေရိကန်မှာ ကျန်ခဲ့တဲ့ ၂ ရက်အတွင်း ပျမ်းမျှအနေနဲ့ နေ့စဉ် အသစ်ကူးစက်ခံ ဦးရေ ၁ သိန်းကျော် ရှိတယ်လို့ အစီရင်ခံထားပါတယ်။

ပျမ်းမျှအားဖြင့် နေ့စဉ် ကူးစက်ခံ သေဆုံးသူ ၄၀၀ ဝန်းကျင် ရှိနေတာပါ။ ဆေးရုံတက် ကုသခံရတဲ့ နှုန်းကလည်း ဖေဖော်ဝါရီကတည်းက ခုထိ အမြင့်ဆုံး ဖြစ်နေပါတယ်။

အမေရိကန်တောင်ပိုင်းဟာ ကူးစက်မှုဗဟိုချက်ဖြစ်နေပြီး ဖလော်ရီဒါပြည်နယ်မှာ စနေနေ့က အသစ်ကူးစက်ခံဦးရေ ၂၄,၀၀၀ ကျော် ရှိနေတယ်လို့ ရောဂါထိန်းချုပ်ရေးနဲ့ ကာကွယ်ရေးဌာနက သတင်းအချက်အလက်တွေက ဆိုပါတယ်။

ကိုဗစ်-၁၉ ကပ်ရောဂါရဲ့ Lambda ဗီဇမျိုးကွဲသစ်ကို အမေရိကန်နိုင်ငံ တက်ဆက်ပြည်နယ် ဟူစတန်မြို့နဲ့ လူဝီစီယားနားပြည်နယ်တို့မှာ ထောက်လှမ်းတွေ့ရှိထားပြီး ဒီဗီဇမျိုးကွဲဟာ ကာကွယ်ဆေးတွေရဲ့ဒဏ်ကို ခံနိုင်ရည်ရှိကြောင်း ပြထားတယ်လို့ လူဝီစီယားနားပြည်နယ် ဂျက်ဖာဆန်မြို့က အော့ခ်စနာဆေးဌာန ဆေးဘက်ဆိုင်ရာ ညွှန်ကြားရေးမှူး ဒေါက်တာအယ်လ်ဒို ရတ်စ်ဆိုကို ကိုးကားပြီး သနယူးစ်ဝိခ် သတင်းမှာ ရေးပါတယ်။