၉ လကြာ စစ်ပွဲအတွင်း တီဂရေးဒေသကိုပါ ကျော်လွန်ထိုးစစ်ဆင်လာတဲ့ သူပုန်တွေကို တိုက်ခိုက်ရေး ပူးပေါင်းကြဖို့ နိုင်ငံသားတွေကို အီသီယိုးပီးယားအစိုးရက သြဂုတ် ၁၀ ရက်မှာ တိုက်တွန်းလိုက်ပါတယ်။

ခုချိန်ဟာ ကာကွယ်ရေးတပ်၊ အထူးတပ်ဖွဲ့နဲ့ ပြည်သူ့စစ်တပ်ဖွဲ့တွေကို ပူးပေါင်းဖို့ အသက်မီတဲ့ စွမ်းရည်ရှိတဲ့ အီသီယိုပီးယား ပြည်သူအားလုံးအတွက် မျိုးချစ်စိတ်ကိုပြဖို့ အချိန်ကောင်းပဲလို့ ဝန်ကြီးချုပ် အဘီအာမဒ်ရဲ့ ရုံးက ကြေညာချက်ထုတ်ပြန် ဆော်သြလိုက်တာပါ။

အရင်က အီသီယိုပီးယားကို နှစ် ၃၀ အုပ်ချုပ်ခဲ့ပြီး ခုတော့ တီဂရေးဒေသကို ထိန်းချုပ်ထားတဲ့ တီဂရေး ပြည်သူ့လွတ်မြောက်ရေးတပ်က တပ်ဖွဲ့တွေနဲ့ ပြည်ထောင်စုစစ်တပ်တို့ကြား နိုဝင်ဘာက စပြီး စစ်ဖြစ်ခဲ့တာပါ။

တိုက်ပွဲတွေကြောင့် ပြည်သူ ၂ သန်းကျော် အိုးအိမ်စွန့်ခွာ ထွက်ပြေးခဲ့ရပြီး ပြည်သူ ၅၀,၀၀၀ ကျော်ကတော့ အိမ်နီးချင်း ဆူဒန်နိုင်ငံထဲကို ထွက်ပြေးခဲ့ရပါတယ်။

အီသီယိုပီးယား အစိုးရက လယ်သမားတွေ လယ်စိုက်နိုင်စေရေးအတွက် ဇွန်လမှာ တဖက်သတ် အပစ်အခတ် ရပ်စဲပေးလိုက်ပါတယ်။

ဒါပေမဲ့ တီဂရေးတပ်တွေက အပစ်အခတ် ရပ်စဲရေးကို ပယ်ချပြီး အစိုးရက သူတို့ရဲ့ တောင်းဆို ချက်တွေကို သဘောတူသင့်တယ်လို့ ပြောပါတယ်။

တီဂရေးတပ်တွေက မေကယ်လီမြို့ကို သိမ်းပိုက်ချိန်မှာတော့ ဝန်ကြီးချုပ်ရုံးက ကြေညာချက် ထွက်လာခဲ့တာပါ။