ရုရှားနိုင်ငံအရှေ့စွန်း ကမ်ချတ်ကာ ကျွန်းဆွယ်က ရေကန်ထဲကို သြဂုတ် ၁၂ ရက်က ကမ္ဘာလှည့်ခရီးသည်တွေ အများစုဖြစ်တဲ့ လူ ၁၆ ယောက်ကို တင်လာတဲ့ ရဟတ်ယာဉ်တစ်စီး ပျက်ကျခဲ့အပြီး လူ ၈ ယောက် သေဆုံးတယ်လို့ ယူဆရပါတယ်။

ရေအနက် ၂၇ ပေလောက်ကနေ ရေကူးလာတဲ့ ရှင်သန်ကျန်ရစ်သူ ၈ ယောက်ကို ရှာဖို့ သဘာဝထိန်းသိမ်းရေး ဒေသထဲက ဝန်ထမ်းတွေ အမြန်မော်တော်ဘုတ် ၂ စီးနဲ့ မိနစ်ပိုင်းအတွင်း ရောက်လာခဲ့ပါတယ်။

အသက်ရှင်ကျန်ရစ်သူ ၂ ဦးက ဆိုးဆိုးရွားရွား ဒဏ်ရာရထားပြီး ရေအပူချိန်က ၅ ဒီဂရီ ဆဲလ်စီးယပ်စ်လောက်ထက် မပိုလို့ သူတို့ ကြာကြာ အသက်ရှင်မှာ မဟုတ်ဘူးလို့ ပြောပါတယ်။

အသက်ရှင်သူတွေဟာ ရဟတ်ယာဉ်နောက်ပိုင်းက ခရီးဆောင်အိတ်တွေ တင်ရာ တံခါးတွေကနေ လွတ်မြောက်လာခဲ့တာလို့ ဒေသန္တရအုပ်ချုပ်ရေးမှူးက အစိုးရရုပ်သံကို ပြောပါတယ်။

ကျန်တဲ့ ၈ ယောက်ကတော့ ပျောက်နေဆဲပါ။ သူတို့ဟာ ရေကန်ရဲ့ ကြမ်းပြင်မှာ ရှိနေနိုင်တယ်လို့ ကျန်းမာရေးသတင်းရင်းမြစ်တွေကို ကိုးကားပြီး အင်တာဖက်စ် သတင်းဌာနက ဖော်ပြပါတယ်။

ရေကန်က နက်လွန်းလို့ ရဟတ်ယာဉ်အပျက် ရှိတဲ့နေရာထိ ရေငုပ်သမားတွေ မငုပ်နိုင်ဘူးလို့ အုပ်ချုပ်ရေးမှူးက ပြောပါတယ်။

မြူတွေ ထူနေလို့ ရဟတ်ယာဉ်မှူးက ရေပြင်ကို မြေပြင်လို့ ထင်ခဲ့ပုံရတယ်လို့ တက်စ် သတင်းဌာနက ရဲသတင်းရင်းမြစ်ကို ကိုးကား ပြောဆိုပါတယ်။

ရုရှားလေကြောင်းဘေးကင်းရေး စံချိန်စံညွှန်းတွေ လတ်တလော နှစ်တွေမှာ တိုးတက်လာပေမဲ့ အိုဟောင်းနေတဲ့ လေယာဉ်တွေ ရဟတ်ယာဉ်တွေကြောင့် မတော်တဆ ဖြစ်တာတွေက ဖြစ်တောင့်ဖြစ်ခဲတော့ မဟုတ်ဘူးလို့ ရိုက်တာသတင်းမှာ ဖော်ပြပါတယ်။