ရုရှားနဲ့ တရုတ်တို့ဟာ အကြီးစား ပူးတွဲစစ်ရေးလေ့ကျင့်မှုကို တရုတ် မြောက်အလယ်ပိုင်းမှာ စစ်သည်အင်အား ၁ သောင်းကျော်နဲ့ ပါဝင်လေ့ကျင့်ခဲ့တယ်လို့ ရုရှားကာကွယ်ရေးဝန်ကြီးဌာနက သြဂုတ် ၁၀ ရက်မှာ ပြောပါတယ်။

ချင်းထုံရှာ စစ်စခန်းမှာ တရုတ် သံချပ်ကာကားတွေကို လေ့လာရင်း စစ်ရေးလေ့ကျင့်ဖို့ ရုရှားစစ်သည်တွေက ပြင်ဆင်နေပုံ ရုပ်သံတွေကိုလည်း ရုရှား ကာကွယ်ရေးဝန်ကြီးဌာနက သြဂုတ် ၉ ရက်မှာ ဖြန့်ချိလိုက်ပါတယ်။ 

အနောက်ဥရောပနိုင်ငံတွေနဲ့ စကားနိုင်လု ပြောဆိုနေကြချိန်မှာ တရုတ်နိုင်ငံ နင်းရှာဒေသက သစီဘူး ပူးပေါင်းဆောင်ရွက်ရေး ၂၀၂၁ လို့ နာမည်ပေးထားတဲ့ စစ်ရေးလေ့ကျင့်မှုတွေကို တရုတ်နဲ့ ရုရှားတို့ရဲ့ စစ်ရေးပူးပေါင်းဆောင်ရွက်မှု တိုးချဲ့လာတဲ့လက္ခဏာအဖြစ် နိုင်ငံတကာက စောင့်ကြည့် နေကြပါတယ်။

သောကြာနေ့ထိ စစ်ရေးလေ့ကျင့်မှာဖြစ်ပြီး ရုရှားစစ်သည်တွေက တရုတ်လက်နက်တွေကို ပထမဆုံး သုံးမယ်လို့ ရုရှားရဲ့ ကွန်းမားဆန့် သတင်းစာက ပြောပါတယ်။

ရုရှားနဲ့ တရုတ်ဟာ ၂၀၀၅ ကတည်းက ပူးတွဲစစ်ရေး လေ့ကျင့်လာတာပါ။ အကြမ်းဖက်ဝါဒ တုံ့ပြန်ရေး အာရုံစိုက်ထားတဲ့ ဒီပူးတွဲ စစ်ရေးလေ့ကျင့်ပွဲအတွက် ရုရှားအစိုးရက ဆူခွိုင် Su-30SM တိုက်လေယာဉ်တွေ၊ မော်တာသုံး ရိုင်ဖယ်တပ်မတွေနဲ့ လေကြောင်းရန် ကာကွယ်ရေးစနစ်တွေကိုပါ ပို့ပေးခဲ့တယ်လို့ ရုရှားကာကွယ်ရေးဝန်ကြီးဌာနက ကြေညာချက် ထုတ်ပြန်ပါတယ်။

အာဖဂန်နစ္စတန်နိုင်ငံမှာ နှစ် ၂၀ ကြာ စစ်ပွဲအပြီး အမေရိကန်တပ်တွေ ပြန်ထွက်သွားလို့ တာလီဘန်တွေက နိုင်ငံတွင်း ခြေကုပ်တွေ တိုးရလာတဲ့အတွက် လုံခြုံရေးအခြေအနေ ယိုယွင်းလာနေတာဟာ ရုရှားအတွက် လုံခြုံရေးအရ ခေါင်းကိုက်စရာ ဖြစ်လာနေတာပါ။

ရုရှအစိုးရဟာ ယူကရိန်းနိုင်ငံဆီကနေ ခရိုင်းမီးယားဒေသကို သိမ်းပိုက်အပြီး အနောက်ဥရောပ နိုင်ငံတွေနဲ့ နိုင်ငံရေးဆက်ဆံမှုဟာ စစ်အေးခေတ်နောက်ပိုင်းမှာ အနိမ့်ဆုံးအဆင့်ကို ထိုးဆင်းခဲ့လို့ ၂၀၁၄ နောက်ပိုင်းမှာ အကြီးဆုံးကုန်သွယ်ဖက်လည်း ဖြစ်တဲ့ တရုတ်ကို ပိုဆက်ဆံလာခဲ့ပါတယ်။