တာဂျစ်ကစ္စတန်နဲ့ အာဖဂန်နစ္စတန် နယ်စပ်ကနေ ၁၂ မိုင်အကွာမှာ ရုရှား၊ တာဂျစ်ကစ္စတန်နဲ့ ဥဇဘက်ကစ္စတန်တို့ စစ်ရေးလေ့ကျင့်မှုကို သြဂုတ် ၁၀ ရက်က အဆုံးသတ်လိုက်ပါတယ်။

တာလီဘန် စစ်သွေးကြွတွေက အလယ်အာရှဒေသနဲ့ တိုက်ရိုက်ကပ်နေတဲ့ နိုင်ငံမြောက်ပိုင်း ခရိုင်တွေ အများအပြားကို ဝင်ရောက်စီးနင်းခဲ့ပါတယ်။

ဒါကြောင့် ရုရှားအစိုးရနဲ့ ဆိုဗီယက်ပြည်ထောင်စု မဟာမိတ်ဟောင်း အလယ်အာရှနိုင်ငံတွေဟာ အာဖဂန်နစ္စတန်နိုင်ငံနားမှာ ဒီလကစပြီး သီးခြား စစ်ရေးလေ့ကျင့်မှု ၂ ခု လုပ်ခဲ့ပါတယ်။

စစ်ရေးလေ့ကျင့်တာကို အာဖဂန်နစ္စတန်နဲ့အတူ လေ့ကျင့်နေတယ်လို့ စိတ်ထဲမှာ ထားပြီး ဆင်နွှဲခဲ့တယ်လို့ တာဂျစ် ကာကွယ်ရေးဝန်ကြီးက သတင်းထောက်တွေကို ပြောပါတယ်။

ဒီစစ်ရေးလေ့ကျင့်မှုမှာ စစ်သည်အင်အား ၂၅၀၀၊ ရာချီတဲ့ သံချပ်ကာယာဉ်တွေ၊ လေယာဉ် ၂၅ စီးတို့ ပါဝင် လေ့ကျင့်ခဲ့ပါတယ်။

ရုရှားရဲ့ အကြီးဆုံးစစ်အင်အားရှိရာ တာဂျစ်ကစ္စတန်နိုင်ငံထဲက စစ်တပ် အခြေစိုက်စခန်းကနေ ရုရှားတပ်တွေ လာရောက်ပူးပေါင်းခဲ့တာပါ။

ခင်းကျင်းပြသခဲ့တဲ့ လက်နက်တွေကို တာဂျစ်ကစ္စတန်နိုင်ငံက အခြေစိုက်စခန်းမှာ ဆက်ထားခဲ့မယ်လို့ ရုရှားရဲ့ အလယ်ပိုင်းစစ်တိုင်း စစ်ဦးစီးမှူး အလက်ဇန်းဒါးလာပင်က ပြောပါတယ်။

တာလီဘန်တွေဟာ နိုင်ငံမြောက်ပိုင်းက ပိုင်နက်တွေကို သိမ်းပိုက်ခဲ့ပြီး အင်္ဂါနေ့မှာ ထိန်းချုပ်မှု တင်းကျပ်ထားခဲ့ပါတယ်။

ဒေသခံတွေက အိမ်တွေထဲမှာ ပုန်းနေခဲ့ပြီး အစိုးရ လိုလားတဲ့ စစ်ဦးစီးမှူးက မြောက်ပိုင်းရဲ့ အကြီးဆုံးမြို့ ဖြစ်တဲ့ မာဇာအီရှာရိဖ်မြို့ကို အသက်ပေး ကာကွယ်သွားမယ်လို့ ကတိပြုခဲ့ပါတယ်။