မန္တလေးမြို့မှာ သြဂုတ် ၁၈ ရက်က ကိုဗစ် -၁၉ ရောဂါနဲ့ သေဆုံးသူ ၁၈ ဦး ရှိခဲ့တယ်လို့ မန္တလေးမြို့ခံ လူမှုကူညီရေးအသင်းက သိရပါတယ်။

မန္တလေးဆေးရုံကြီးရင်ခွဲရုံက ကိုဗစ်လူနာ ၁၂ ဦး၊ ချမ်းမြသာစည်ကိုဗစ်ကုသရေးဆေးရုံက ၁ ဦး၊ ခုတင် ၃၀၀ သင်ကြားရေးဆေးရုံက ၁ ဦး၊ မြို့တော်ဆေးရုံက ၁ ဦး၊ အရပ်ထဲမှာ ကိုဗစ်လူနာ ၃ ဦး သေဆုံးခဲ့ပြီး မြို့ခံပရဟိတအဖွဲ့တွေက အေးရိပ်ငြိမ်သုသာန်နဲ့ တောင်အင်းမြောက်အင်းသုသာန်ကို  ပို့ဆောင်သင်္ဂြိုဟ်ပေးခဲ့ကြပါတယ်။

ဖော်ပြပါ ကိုဗစ်ကြောင့် သေဆုံးသူ စာရင်းဟာ မန္တလေးမြို့ခံပရဟိတအသင်းတချို့ရဲ့ ကူညီဆောင်ရွက်ပေးခဲ့ အချက်အလက်တွေသာဖြစ်ပါတယ်။

သေဆုံးသူအများစုက အသက်အရွယ်ကြီးသူတွေ ရောဂါအခံရှိသူတွေ ဖြစ်ပြီး ဆေးခန်းမပြသနိုင်ခြင်း၊ ဆေးဝါးအခက်အခဲ၊ အောက်ဆီဂျင်အခက်အခဲတို့ကြောင့် သေဆုံးကြတာပါ။

စစ်ကောင်စီ ကျန်းမာရေးဝန်ကြီးဌာနရဲ့ သြဂုတ် ၁၈ ရက် ညပိုင်းက ထုတ်ပြန်ချက်အရ မန္တလေးမြို့မှာ သြဂုတ် ၁၇ ရက်က ကိုဗစ်ကူးစက်ခံရသူ ၁၆ ဦး ရှိပြီး ကိုဗစ်ကြောင့် သေဆုံးသူ ၈ ဦး ရှိတယ်လို့ သိရပါတယ်။

ဇူလိုင်လက တစ်ရက်ကို ကိုဗစ်လူနာ ၈၀ ဦးကျော် သေဆုံးခဲ့ပြီး ဇူလိုင်လ တစ်လအတွင်း ကိုဗစ်လူနာနဲ့ သံသယရှိသူ ၂၀၀၀ ကျော် သေဆုံးခဲ့တယ်လို့ မြို့ခံ လူမှုကူညီရေးအသင်းတွေဆီက သိရပါတယ်။