မကွေးတိုင်း၊ မင်းဘူးမြို့မှာ သြဂုတ် ၂၇ ရက်နေ့ည ၇ နာရီဝန်းကျင်လောက်က အပြန်အလှန်ပစ်ခတ်မှုတွေ ဖြစ်ခဲ့ပြီး မင်းဘူးခရိုင်ရဲမှူးရုံး ဗုံးခွဲတိုက်ခိုက်ခံရတယ်လို့ သိရပါတယ်။

ရဲစခန်းနဲ့နီးစပ်သူတဦးက “အမှတ် ၄ မမင်းဘူးရပ်ကွက်မှာ ည ၇ ခွဲလောက်က အပြန်အလှန် ပစ်ခတ်သံတွေလည်းကြားရတယ်။ မမင်းဘူးရပ်ကွက်ရဲ့ အနောက်ဘက် မကျီးချောင်းရွာနားက ခရိုင်ရဲမှူးရုံးလည်း ဗုံးနှစ်လုံးနဲ့တိုက်ခိုက်တာ တစ်လုံးပေါက်ကွဲပြီး တလုံးကမပေါက်လို့ ရှာနေကြတယ်။ ပျက်စီးမှုတော့ မသိရသေးဘူး” လို့ ပြောပါတယ်။

အခုဗုံးခွဲတိုက်ခိုက်မှုကို မင်းဘူး-စကုပြည်သူ့ကာကွယ်ရေးတပ်ဖွဲ့ (M.S PDF) က ပဏာမသတိပေး ခြိမ်းခြောက်မှုတခုအနေနဲ့ ပြုလုပ်ခဲ့တာဖြစ်ပြီး ပြည်သူလူထုကို မတရားအနိုင်ကျင့်မှုတွေ ဆက်လက်လုပ်ဆောင်နေပါက တိုးမြှင့်တိုက်ခိုက်ချေမှုန်းသွားမယ်လို့ သတင်းထုတ်ပြန်ထားပါတယ်။

အပြန်အလှန်ပစ်ခတ်မှုနဲ့ ဗုံးနှစ်လုံးပေါက်ကွဲမှုကြောင့် သေဆုံး ဒဏ်ရာရမှုအခြေအနေကိုတော့ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။