ဟာရီကိန်းအိုင်ဒါကြောင့် အမေရိကန်အရှေ့မြောက်ပိုင်းမှာ လူ ၄၆ ဦး ထက်မနည်း သေဆုံးခဲ့ပြီးနောက်မှာ အစွန်းရောက်ရာသီဥတု ဖြစ်စဉ်များကို ကိုင်တွယ်ဖြေရှင်းဖို့ အခြေခံ အဆောက်အဦတွေ တိုးတက်ကောင်းမွန်ဖို့ လိုအပ်တယ်လို့ နယူးယောက်နဲ့ နယူးဂျာစီရှိ တာဝန်ရှိသူတွေက စက်တင်ဘာ ၃ ရက်မှာ ပြောကြားခဲ့ပါတယ်။

 အိုင်ဒါမုန်တိုင်းဟာ သြဂုတ် ၂၉ ရက်က အမျိုးအစား ၄ မုန်တိုင်းအဖြစ် ပင်လယ်ကွေ့ ကမ်းရိုးတန်းကို တိုက်ခတ်ခဲ့ပြီး အမေရိကန်ပြည်ထောင်စုအရှေ့ဘက်ကိုဖြတ်ပြီး မြောက်ဘက်ကို ဦးတည်ခဲ့ပါတယ်။ 

စက်တင်ဘာ ၁ ရက် ညမှာတော့ ပင်ဆယ်ဗေးနီးယား၊ နယူးဂျာဆီ၊ ကွန်နက်တိကပ်နဲ့ နယူးယော့တို့မှာ ပြင်းထန်တဲ့မိုးတွေ ရွာသွန်းခြင်းနဲ့ မြန်မြန်မြင့်တက်လာတဲ့ ရေကြီးရေလျှံမှု တွေကြောင့် အခြေအနေ အမြင့်ဆုံးကို ရောက်ခဲ့ပါတယ်။ 

လူထောင်ပေါင်းများစွာဟာ သူတို့ရဲ့အိမ်တွေ၊ ကားတွေပေါ်မှာ သောင်တင်နေပြီး အရေးပေါ် ကယ်ဆယ်ရေးသမားတွေ၊ အိမ်နီးချင်းတွေက ဖောင်တွေ၊ အသက်ကယ်လှေတွေနဲ့ ကယ်ဆယ်ပေး ခဲ့ပါတယ်။ 

အခုတော့ လူတွေဟာ ရေတွေဝင်နေတဲ့ မြေအောက်ခန်းတွေ၊ ဓာတ်အားပြတ်တောက်ခြင်းနဲ့ အိမ်ခေါင်မိုးပျက်စီးတာတွေကို ဖြေရှင်းနေရပြီး တာဝန်ရှိသူတွေကလည်း အပျက်အစီးကို အကဲ ဖြတ်နေတာပါ။

မုန်တိုင်းကြောင့် နယူးယောက်မှာ ၁၆ ဦး သေဆုံးပြီး၊ နယူးဂျာစီမှာ ၂၅ ဦး၊ ပင်ဆယ်လ်ဗေးနီးယားမှာ ၄ ဦးနဲ့ ကွန်နက်တီကပ်ပြည်နယ်မှ တပ်ဖွဲ့ဝင် ၁ ဦး သေဆုံးသွားတယ်လို့ တာဝန်ရှိသူတွေက အတည်ပြုခဲ့ပါတယ်။ 

လူတွေဟာ ကမ္ဘာကြီးပူနွေးလာမှုနဲ့ ရာသီဥတုပြောင်းလဲခြင်းတို့ကြောင့် ပိုပြင်းထန်လာတဲ့ ကြိမ်နှုန်းတွေနဲ့အတူ အစွန်းရောက် ရာသီဥတုကို ကြိုတွေးထားသင့်ပြီး အစိုးရကလည်း လူ့အသက်တွေကို ကယ်တင်ဖို့ ပိုမိုမြန်ဆန်တဲ့ အရေးယူဆောင်ရွက်မှု လိုအပ်တယ်လို့ နယူးယော့ခ်အုပ်ချုပ်ရေးမှူး ကေသီဟိုချူးလ်က သောကြာနေ့မှာ ပြောပါတယ်။