သြစတြေးလျနိုင်ငံ၊ ဗစ်တိုးရီးယားပြည်နယ်မှာ စက်တင်ဘာ ၂၅ ရက် စနေနေ့ ညနေပိုင်းမှာ လူကြိုက်များတဲ့ ဘောလုံးပြိုင်ပွဲ ကျင်းပဖို့ ရှိပေမဲ့ ပရိသတ်တွေ လူစုလူဝေး မလုပ်ကြဖို့ ကျန်းမာရေးဌာနက သတိပေးထားပါတယ်။

မဲလ်ဘုန်းမြို့ခံ အသင်းနှစ်သင်းရဲ့ နောက်ဆုံးဗိုလ်လုပွဲဖြစ်ပြီး ပုံမှန်အားဖြင့် မြို့ထဲက အားကစားကွင်းမှာ ကျင်းပလေ့ရှိပေမဲ့ ဒီနှစ်မှာတော့ ဗိုင်းရပ်စ်ကင်းရှင်းတဲ့ အနောက်ပိုင်း သြစတြေးလျမှာ ပြောင်းရွှေ့ကစားမှာ ဖြစ်ပါတယ်။

ဘောလုံးပရိသတ်တွေ အိမ်တွေမှာ စုပြီး ဘောလုံးပွဲကြည့်မှာကိုလည်း အစိုးရအရာရှိတွေက စိုးရိမ်နေပါတယ်။

ဒီတပတ်အတွင်း မဲလ်ဘုန်းမှာ ကိုဗစ်ကာကွယ်ဆေး မထိုးချင်သူတွေက ဆန္ဒပြခဲ့ကြပြီး လူ ၃၀ လောက်ကို ရဲက ဖမ်းဆီးထားပါတယ်။ 

စနေနေ့ မနက်ပိုင်း ထုတ်ပြန်ချက်အရ တစ်ရက်တည်းမှာ ကိုဗစ် လူနာအသစ် ၈၄၇ ယောက် တွေ့ရှိရပြီး နောက်ထပ်တစ်ယောက် ထပ်မံသေဆုံးသွားတယ်လို့ ဆိုပါတယ်။

ရောဂါကူးစက်မှုတွေ နိုဝင်ဘာလအလယ်လောက်အထိ ဆက်လက်မြင့်တက်နိုင်တယ်လို့ အစိုးရက ခန့်မှန်းထားပြီး ပြည်သူတွေကို ကိုယ်အိမ်ထဲမှာပဲ နေကြဖို့ ကန့်သတ်ချက်လည်း ဆက်ရှိနေပါတယ်။