ထိုင်းနိုင်ငံ အယုဒ္ဓယတွင် စက်လှေမှောက်ပြီး လူ ၂ ဦးပျောက်ဆုံးနေ

ထိုင်းနိုင်ငံမှာ ရေကြီးရေလျှံမှုနောက်ဆက်တွဲအဖြစ် စက်တင်ဘာ ၂၉ က ထိုင်းအလယ်ပိုင်း အယုဒ္ဓယမြို့နယ်ထဲမှာ ကုန်တင်လှေကိုဆွဲတဲ့ စက်လှေတစ်စီး တိမ်းမှောက်သွားပြီး လူ ၂ ဦးပျောက်ဆုံးနေပါတယ်။
ဒီမနက် ၁၀ နာရီခွဲလောက်က အယုဒ္ဓယမြို့နယ် ကမန်းအုပ်စုအပိုင်းရှိ ပါဆပ်မြစ်ထဲမှာ ကုန်တင်လှေ ၁ စီးကို စက်လှေ ၅ စီးက ဆွဲလာခဲ့ကြောင်း ၊ မဲနန်ချောင်ဖရာမြစ်ဆုံနားရောက်တော့ ရှေ့ဆုံးကနေ ဆွဲနေတဲ့ စက်လှေတစ်စီးက စက်ချို့ယွင်းသလိုဖြစ်ပြီး မူမမှန်လို့ ဖုံးနဲ့ဗွီဒီယို ရိုက်လိုက်စဉ် သူ့ရှေ့မှာဘဲ စက်လှေမှောက်ပြီး နစ်မြှုပ်သွားတာလို့ ကမ်းခြေရှိမျက်မြင်တစ်ဦးက သတင်းထောက်ကို ပြောပါတယ်။
ဒါကြောင့် ကယ်ဆယ်ရေးအဖွဲ့ကို ဆက်သွယ်အကူအညီတောင်းခဲ့ကြောင်း ၊ ခဏအကြာ ကယ်ဆယ်ရေးအဖွဲ့တွေရောက်လာပြီး စက်လှေပေါ်ပါသွားသူတွေကို လိုက်လံရှာဖွေနေကြတယ်လို့ မျက်မြင်က ပြောပါတယ်။
နစ်မြုပ်သွားတဲ့ စက်လှေထဲမှာ လှေခုတ်မောင်းသူ နိုင်းဆုမ်ချိုင်းထာရကွန်း ( ၆၂ ) နှစ်နဲ့ ဇနီးဖြစ်သူ နန်းနရစ်မွန်းတို့ နှစ်ဦးပါသွားပြီး ရေစီးလည်းအလွန်သန်တာကြောင့် ခဲယဉ်းစွာ ရှာဖွေကယ်ဆယ်နေရတယ်လို့ ကယ်ဆယ်ရေးအဖွဲ့က ပြောပါတယ်။
ဒီကနေ့ ထိုင်းစံတော်ချိန် ညနေ ၃ နာရီထိ ပျောက်ဆုံးနေသူတွေကို ရှာလို့မတွေ့သေးပါဘူး ။