မန်ချက်စတာယူနိုက်တက် တိုက်စစ်မှူး စီရော်နယ်ဒိုရဲ့လုပ်အားအပေါ် လူတွေကဝေဖန်နေကြပေမယ့် ဂိုးတွေသွင်းပြပြီး အကောင်းဆုံး ခြေစွမ်းပြနေကြောင်း ဖာဒီနန်ကချီးကျူးပါတယ်။

ရော်နယ်ဒိုဟာ မနေ့ညက ကစားခဲ့တဲ့ အတ္တလန်တာနဲ့ ၂ ဂိုးစီ သရေကျသွားတဲ့ ချန်ပီယံလိဂ်ပွဲစဉ်မှာ မန်ယူနိုက်တက်အသင်းအတွက် အရေးပါတဲ့ ချေပဂိုး ၂ ဂိုးကို သွင်းယူ ပေးခဲ့တာပါ။

ရော်နယ်ဒိုဟာ ဒီနှစ်ချန်ပီယံလိဂ်မှာ ၃ ကြိမ်မြောက် နောက်ကျဂိုးသွင်းပြီး အသင်းကို ကယ်နိုင်ခဲ့ပြီး အုပ်စုပထမနေရာမှာဆက်လက်ရပ်တည်နိုင်ခဲ့ပါတယ်။

“လူတွေက သူ့ကို လုပ်အားနှုန်းမကောင်းဘူးလို့ ပြောကြပေမယ့် သူကပွဲရဲ့ အခက်ခဲဆုံးအရာလို့ဆိုနိုင်တဲ့  ဂိုးတွေသွင်းပြ နေတယ်။ သူဟာ ဝေဖန်မှုတွေကို နိုင်ငံတိုင်း၊ လိဂ်တိုင်းနဲ့ အချိန်တိုင်းမှာ ချေဖျက်နိုင်ခဲ့သူပါ” ဖာဒီနန် က ရော်နယ်ဒိုကို ချီးကျူးခဲ့တာပါ။

မန်ယူနိုက်တက်အသင်းဟာ အတ္တလန်တာကို  အဝေးကွင်းမှာ သရေကစားနိုင်ခဲ့တာကြောင့် ဒုတိယနေရာက ဗီလာရီးယဲလ်နဲ့ရမှတ်တူ ထိပ်တိုက် တွေ့ဆုံမှုအသာနဲ့ လက်ကျန် ၂ပွဲအလိုမှာ အုပ်စုပထမနေရာမှာရပ်တည်နေပါတယ်။