ဩစတြေးလျဝန်ကြီးချုပ် စကော့မောရစ်ဆင်က ပြင်သစ်နဲ့ ချုပ်ဆိုထားတဲ့ အမေရိကန် ဒေါ်လာ ၆၈ ဘီလီယံတန်တဲ့ ရေငုပ်သင်္ဘောကန်ထရိုက်ကို သဘောတူညီချက်ကိုဖျက်အပြီး သူ့လုပ်ရပ်ကို ကမ္ဘာ့ရာသီဥတု ညီလာခံ COP26 မှာ မီဒီယာတွေကို နိုဝင်ဘာ ၁ ရက်က ခုခံပြောဆိုလိုက်ပါတယ်။

“လူတွေ ဘာပြောပြော ကျနော် ခံနိုင်တယ်။ ဒါပေမဲ့ ဩစတြေးလျနိုင်ငံဟာ ကာကွယ်ရေးစွမ်းရည်အတွက် ဂုဏ်ယူစရာမှတ်တမ်း ရှိလာပြီ။”

ရေငုပ်သင်္ဘော တည်ဆောက်ရေး ကန်ထရိုက်ကို ဖျက်သိမ်းခဲ့တာနဲ့ပတ်သက်ပြီး ဩစတြေးလျ ဝန်ကြီးချုပ်က သူ့ကို လိမ်တယ်လို့ ပြင်သစ်သမ္မတ အီမန်နျူယယ်မက်ခွန်းက ပြောခဲ့ပါတယ်။

အသစ်ဖွဲ့စည်းလိုက်တဲ့ လုံခြုံရေး မိတ်ဖက်သစ်  AUKUS ရဲ့ အဖွဲ့ဝင် ဖြစ်လာတဲ့ ဩစတြေးလျဟာ နျူကလီးယား စွမ်းအင်သုံး ရေငုပ်သင်္ဘောတွေကို ပိုင်ဆိုင်ခွင့်ရခဲ့တာပါ။

ဒါကြောင့် ပြင်သစ်အစိုးရက သစ္စာဖောက်ခံရတယ်လို့ စွပ်စွဲရင်း အမေရိကန်နဲ့ ဩစတြေးလျနိုင်ငံတွေက သူ့ရဲ့ သံအမတ်ကြီးတွေကို ပြန်ခေါ်ခဲ့ပါတယ်။

အမေရိကန်သမ္မတ ဂျိုးဘိုင်ဒန်ကတော့ AUKUS သဘောတူညီချက်ကို မကြေညာခင်ကတည်းက ကန်ထရိုက် ဖျက်သိမ်းကြောင်း ပြင်သစ်ကို အကြောင်းကြားခဲ့ပြီးသားလို့ ထင်ခဲ့ကြောင်း အောက်တိုဘာ ၂၉ ရက်မှာ ပြောခဲ့ပါတယ်။

ဒါ့အပြင် လုံခြုံရေးသဘောတူညီချက်အသစ်ကို ကိုင်တွယ် ဖြေရှင်းပုံက မသေမသပ် ဖြစ်ခဲ့တယ်လို့လည်း ပြောပါတယ်။