ချန်ပီယံလိဂ်ပွဲ ၁၀၀ ၌ သွင်းဂိုးအများဆုံးကစားသမားအဖြစ် လီဝန်ဒေါစကီး ရပ်တည်
ဥရောပချန်ပီယံလိဂ်ပွဲ ၁၀၀ ပြည့်ချိန်မှာ သွင်းဂိုးအများဆုံးကစားသမားအဖြစ် ဘိုင်ယန်မြူးနစ်တိုက်စစ်မှူး လီဝန်ဒေါစကီး ရပ်တည်နိုင်ခဲ့ပါတယ်။
လီဝန်ဒေါစကီးဟာ ချန်ပီယံလိဂ်ပွဲ ၁၀၀ မှာ ၈၁ ဂိုးအထိ သွင်းယူခဲ့ခြင်းဖြစ်ပြီး အရင်က ချန်ပီယံလိဂ်ပွဲ ၁၀၀ ပြည့်ချိန်မှာ ဂိုးသွင်း အများဆုံးအဖြစ် စံချိန်တင်ထားတဲ့ PSG တိုက်စစ်မှူး မက်ဆီရဲ့ ၇၅ ဂိုး စံချိန်ကို ၆ ဂိုးအသာနဲ့ ကျော်ဖြတ်နိုင်ခဲ့တာပါ။
နိုဝင်ဘာ ၂ ရက်က ကစားခဲ့တ့ ချန်ပီယံလိဂ်ပွဲစဉ် ဘိုင်ယန်မြူးနစ်နဲ့ ဘင်ဖီကာပွဲမှာ လီဝန်ဒေါစကီး ဟာ ပထမပိုင်းပြီးခါနီး ရရှိခဲ့တဲ့ ပယ်နယ်တီကို လွဲချော်ခဲ့ပေမဲ့လည်း ပွဲချိန် ၂၆ မိနစ်၊ ၆၁ မိနစ်နဲ့ ၈၄ မိနစ်တို့မှာ ဟက်ထရစ် ၃ ဂိုး သွင်းယူခဲ့ပါတယ်။
အဲဒီပွဲမှာ လီဝန်ဒေါစကီးအတွက် ကစားသမားဘဝ ချန်ပီယံလိဂ်ပွဲ ၁၀၀ ပြည့်မြောက်တဲ့ပွဲဖြစ်ပြီး ရာပြည့်ပွဲကစားသူတွေထဲမှာလည်း ဂိုးသွင်းအများဆုံးအဖြစ် စံချိန်သစ်တင်နိုင်ခဲ့တာပါ။
လက်ရှိ ချန်ပီယံလိဂ်သမိုင်းရဲ့ ဂိုးသွင်းအများဆုံးစာရင်းမှာတော့ မန်ယူဝါရင့်တိုက်စစ်မှူး စီရော်နယ်လ်ဒိုက ၁၃၉ ဂိုးနဲ့ ဦးဆောင်နေပြီး PSG တိုက်စစ်မှူး မက်ဆီက ၁၂၃ ဂိုးနဲ့ ဒုတိယ နေရာမှာ ရပ်တည်နေကာ လီဝန်ဒေါစကီးကတော့ အဆင့် ၃ နေရာမှာ ရပ်တည်နေပါတယ်။
