ပြည်သူအားလုံး ကျန်းမာရေးဂရုစိုက်ဖို့၊ ညီညီညွတ်ညွတ်နေကြဖို့နဲ့ ပြည်သူတွေရဲ့စီးပွားရေး အခက်အခဲတွေကိုကြားသိရတဲ့အတွက် စိတ်မကောင်းဖြစ်ရတယ်လို့  နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်ပါတယ်။

နိုဝင်ဘာ ၅ ရက် ဒီကနေ့  နိုင်ငံတော်အတိုင်ပင်ခံပုဂ္ဂိုလ်ကို စစ်ကောင်စီက စွဲဆိုထားတဲ့ အဂတိအမှု ၄ မှုထဲက ၂ မှုကို နေပြည်တော် ဇမ္ဗူသီရိတရားရုံးမှာ ဆက်လက်စစ်ဆေးစဉ် ပြောဆိုခဲ့တာလို့ တရားရုံးနဲ့နီးစပ်တဲ့အသိုင်းအဝိုင်းဆီက စုံစမ်းသိရှိရပါတယ်။

ဒီနေ့ အမှုနံပတ် ၃ နဲ့ ၄ ကိုဆက်လက်စစ်ဆေးခဲ့ပြီး နေပြည်တော်စည်ပင်ဌာနမှူးဟောင်း ဦးစိုးနိုင်ကို အပြန်အလှန်စစ်မေးတာတွေ ဆောင်ရွက်ခဲ့ပါတယ်။

ဒီနေ့ရုံးချိန်းမှာ တရားရုံးက အမှုနံပတ်  ၂ အတွက် တရားလိုပြသက်သေ ရန်ကုန်တိုင်းဝန်ကြီးချုပ် ဦးဖြိုးမင်းသိန်းရဲ့ ဇနီးဒေါ်ခင်မိမိကြွယ်ကို ခေါ်ဆိုထားပေမယ့် ရောက်လာခဲ့ခြင်းမရှိပါဘူး။

အဂတိအမှုလေးမှုထဲက အမှုနံပတ် ၂ ရွှေချောင်းနဲ့ ဒေါ်လာတွေရယူထားတယ်ဆိုတဲ့ အမှုအတွက် ရန်ကုန်တိုင်းဝန်ကြီးချုပ် ဦးဖြိုးမင်းသိန်းက အောက်တိုဘာ ၁ ရက်နေ့ရုံးချိန်းမှာ စစ်ကောင်စွဲရဲ့ စွဲချက်မှန်ကန်ကြောင်း ထွက်ဆိုထားပါတယ်။ 

နိုဝင်ဘာ ၅ ရက်နေ့ရုံးချိန်းမှာ အမှုနံပတ် ၂ နဲ့ ၅ အတွက် တရားလိုပြသက်သေတွေ ရောက်မလာတဲ့အတွက် အဲ့ဒီအမှုတွေကို မစစ်ဆေးနိုင်ခဲ့ပါဘူး။ နောက်ရုံးချိန်းကိုတော့ နိုဝင်ဘာ ၁၂ရက်နေ့မှာ ပြန်လည်ချိန်းဆိုခဲ့ပါတယ်။

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက အဂတိမှု ၄ မှုအတွက် မန္တလေးတိုင်းတရားရုံးမှာ တရားစွဲဆိုခဲ့တာဖြစ်ပြီး နေပြည်တော်မှာ စစ်ဆေးနေတာဖြစ်ပါတယ်။ ဒေါ်အောင်ဆန်းစုကြည်ဟာ အဂတိအမှု ၄ မှုအပါအဝင် စစ်ကောင်စီစွဲဆိုထားတဲ့ အမှု ၁၁မှုနဲ့ တရားစွဲခံထားရတာဖြစ်ပါတယ်။