အိန္ဒိယနိုင်ငံတောင်ပိုင်းကမ်းရိုးတန်းမှာ ညလုံးပေါက် မိုးကြီးအပြီး နေရာအတော်များများမှာ ရေကြီး နေလို့ နိုင်ငံရဲ့ ကုန်ထုတ်လုပ်ရေးမြို့တော် ချန်နိုင်းမှာ နိုဝင်ဘာ ၇ ရက်က အသွားအလာ ရပ်တန့်နေပါတယ်။

မြေနိမ့်ဒေသက ပြည်သူတွေကို ဘေးကင်းရာ ရွှေ့ပြောင်းခဲ့ရသလို ရေကြီး သတိပေးချက်ကို အာဏာပိုင်တွေက ထုတ်ပြန် ခဲ့ရပါတယ်။

ကားတွေ ရေအောက်မြုပ်နေပုံတွေ၊ အပင်တွေ အမြစ်က ကျွတ်ထွက်နေပုံတွေနဲ့ လူတွေကို ရာဘာလှေတွေနဲ့ ကယ်ထုတ်နေရပုံတွေကို မီဒီယာတွေက ပြသခဲ့ပါတယ်။

ချန်နိုင်းမြို့ဟာ ကြီးမားတဲ့ ကားထုတ်လုပ်ရေး လုပ်ငန်းရှိလို့ အိန္ဒိယရဲ့ ဒက်ထရွိုက်လို့လည်း တင်စား ခေါ်ပြီး နိုင်ငံတောင်ပိုင်း တမီနာဒူပြည်နယ်ရဲ့အကြီးဆုံးမြို့လည်း ဖြစ်ပါတယ်။

ခုတော့ ဒီမြို့မှာ ကယ်ဆယ်ရေးဌာနတွေနဲ့ ဆေးကုသရေးစခန်းတွေ ဖွင့်ထားပြီး ရေဘေးသင့်ဒေသခံတွေအတွက် စားနပ်ရိက္ခာ တွေကို ဖြန့်ဖြူးပေးနေတယ်လို့  မဟာချန်နိုင်းကော်ပိုရေးရှင်းက ပြောပါတယ်။

လာမယ့် လေးရက်အတွင်း အန်ဒရာပရာဒေ့ရှ် ပြည်နယ်တောင်ပိုင်း၊ ပူဒူချာရီဒေသနဲ့ တမီနာဒူ ပြည်နယ်တဝန်း မိုးအကြီးအကျယ် ဆက်ရွာမယ်လို့ မျှော်လင့်ထားတဲ့အကြောင်း အိန္ဒိယ မိုးလေဝသဌာနက တနင်္ဂနွေနေ့မှာ ကြေညာချက် ထုတ်ပြန် ထားပါတယ်။

ငါးဖမ်းသမားတွေ ပင်လယ်ပြင်ကို မထွက်ဖို့ကိုလည်း သတိပေးထားတဲ့အပြင် ဘင်္ဂလား ပင်လယ်အော်က လေဖိအားနည်း ရပ်ဝန်းကြောင့် မိုးဆက်ရွာမယ်လို့လည်း ပြောထားပါတယ်။