ဗီယက်နမ်နိုင်ငံမှာ ကိုဗစ်-၁၉ ရောဂါကူးစက်ခံရသူ ၁ သန်းကျော်လာခဲ့ပြီးနောက် ကမ္ဘာတဝန်း သန်းချီကူးစက်ခံရတဲ့ နိုင်ငံပေါင်း ၃၇ နိုင်ငံထိ ရှိလာပါတယ်။

တကမ္ဘာလုံးအတိုင်းအတာနဲ့ ရောဂါကူးစက်ခံရသူ ၂၅၂ ဒသမ ၆၅ သန်းကျော်၊ သေဆုံးသူ ၅ သန်းကျော်နဲ့ ရောဂါပြန်လည်ပျောက်ကင်းလာသူအရေအတွက်ကတော့ ၂၂၈ ဒသမ ၅၇ သန်းကျော် ရှိနေတာပါ။

ဗီယက်နမ်နိုင်ငံမှာ ပထမဆုံး ကိုဗစ်-၁၉ အတည်ပြုလူနာကိုတော့ ပြီးခဲ့တဲ့ ၂၀၂၀ ပြည့်နှစ်၊ ဇန်နဝါရီလတုန်းက တရုတ်နိုင်ငံသား ၂ ယောက်မှာ စတင်တွေ့ရှိခဲ့တာ ဖြစ်ပါတယ်။

လက်ရှိမှာတော့ ကိုဗစ်-၁၉ အတည်ပြုလူနာ ၁ သန်းကျော်နဲ့ သေဆုံးသူပေါင်း ၂၂,၀၀၀ ကျော် ရှိလာခဲ့ပြီ ဖြစ်ပါတယ်။

ရောဂါဖြစ်ပွားမှု အမြင့်ဆုံးနိုင်ငံတွေထဲမှာတော့ အမေရိကန်နိုင်ငံက ကူးစက်ခံရသူ ၄၇ ဒသမ ၆၉ သန်းကျော်၊ သေဆုံးသူ ၇ သိန်း ၈ သောင်းကျော် ရှိနေပြီး သူ့နောက်မှာတော့ အိန္ဒိယနိုင်ငံက ကူးစက်ခံရသူ ၃၄ ဒသမ ၄၁ သန်းကျော်၊ သေဆုံးသူ ၄ သိန်း ၆ သောင်းကျော်နဲ့ ရှိနေပါတယ်။

တတိယနေရာမှာတော့ ဘရာဇီးနိုင်ငံက ကိုဗစ်-၁၉ ရောဂါကူးစက်ခံရသူ ၂၁ ဒသမ ၉၂ သန်းကျော်၊ သေဆုံးသူ ၆ သိန်းကျော်နဲ့ ထိပ်ဆုံး ၃ နိုင်ငံအနေနဲ့ အသီးသီး ရပ်တည် နေပါတယ်။

အဲဒီ ၃ နိုင်ငံနောက်မှာတော့ ယူကေနိုင်ငံက ကူးစက်ခံရသူ ၉ သန်းကျော်၊ ရုရှားနဲ့ တူရကီ နိုင်ငံတွေက ကူးစက်ခံရသူ ၈ သန်းကျော်၊  ပြင်သစ်နိုင်ငံက ကူးစက်ခံရသူ ၇ သန်းကျော်စီ၊ အီရန်နိုင်ငံက ၆ သန်းကျော်၊ အာဂျင်တီးနား၊ ကိုလံဘီယာ၊  စပိန်နိုင်ငံတွေက ကူးစက်ခံရ သူ ၅ သန်းကျော်စီ၊ ဂျာမနီ၊ အီတလီနဲ့ အင်ဒိုနီးရှားနိုင်ငံတွေက ကူးစက်ခံရသူ ၄ သန်း ကျော်စီ၊ ပိုလန်၊ မက္ကဆီကို၊ ယူကရိန်းနိုင်ငံတွေက ကူးစက်ခံရသူ ၃ သန်းကျော်စီ၊ တောင် အာဖရိက၊ ဖိလစ်ပိုင်၊ မလေးရှား၊ နယ်သာလန် ပီရူး၊ အီရတ်နဲ့ ထိုင်းနိုင်ငံတွေက ကူးစက်ခံရသူ ၂ သန်းကျော်စီ ရှိနေပါတယ်။

အဲဒီနောက်မှာတော့ ချက်သမ္မတနိုင်ငံ၊ ကနေဒါ၊ ရိုမေးနီးယား၊ ဂျပန်၊ ချီလီ၊ ဘင်္ဂလားဒေ့ရှ်၊ ဘယ်လ်ဂျီယမ်၊ အစ္စရေး၊ ပါကစ္စတန်၊ ဆားဘီးယား၊ ဆွီဒင်၊ ပေါ်တူဂီနိုင်ငံတွေနဲ့အတူ ဗီယက်နမ်နိုင်ငံမှာလည်း ကိုဗစ်-၁၉ ရောဂါကူးစက်ခံရသူ အရေအတွက် ၁ သန်းကျော် လာခဲ့ပြီ ဖြစ်တာမို့ ခုချိန်ထိ ကမ္ဘာတဝန်း ကိုဗစ်-၁၉ ရောဂါကူးစက်ခံရသူ ဦးရေ ၁ သန်း ကျော်လာခဲ့တဲ့ နိုင်ငံပေါင်း ၃၇ နိုင်ငံထိ ရှိလာခဲ့ပြီလို့ Worldometers ဝက်ဘ်ဆိုက်ဒ်မှာ ဖော်ပြထားပါတယ်။

ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အ ရေအတွက် ၉ သောင်း ၈ ထောင်ကျော်၊ စုစုပေါင်း သေဆုံးသူ ၄,၆၃၆ ယောက်နဲ့ နိုင်ငံအလိုက် အမှတ်စဉ် ၁၁၃ နေရာထိ ကျဆင်းသွားခဲ့ပါတယ်။

အာဆီယံဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့်ဆုံး နိုင်ငံတွေအဖြစ် အင်ဒိုနီးရှား၊ ဖိလစ်ပိုင်၊ မလေးရှားနဲ့ ထိုင်းနိုင်ငံတွေက အသီးသီး ရပ်တည်နေပါတယ်။

မြန်မာနိုင်ငံမှာတော့ လက်ရှိအချိန်ထိ ကိုဗစ်-၁၉ အတည်ပြု လူနာစုစုပေါင်း ၅ သိန်း ၁ သောင်းကျော်၊ သေဆုံးသူ ၁၈,၀၀၀ ကျော် ရှိနေပါတယ်။