အာရှပစိဖိတ် ဒေသအတွင်း မတည်မငြိမ် ဖြစ်နေချိန်မှာ တရုတ်နဲ့ ရုရှား ကြည်း၊ ရေ၊ လေ အဓိက စစ်တပ်ကြီး ၃ တပ်လုံးဟာ ၂၀၂၁ ခုနှစ်အတွင်း ဗျူဟာမြောက် ပူးပေါင်းဆောင်ရွက်ရေးကို ပူးတွဲ လုပ်ဆောင်နေတယ်လို့ တရုတ်နဲ့ ရုရှား ကာကွယ်ရေးဝန်ကြီးဌာနတွေက ကြေညာချက် ထုတ်ပြန်ပါတယ်။

တရုတ်နဲ့ ရုရှား ဗုံးကြဲလေယာဉ်တွေဟာ နိုဝင်ဘာ ၁၉ ရက်က အရှေ့တရုတ်ပင်လယ်ထဲမှာ ပူးတွဲကင်းလှည့်နေတာ ဖြစ်ပြီး ဒါဟာ တရုတ်နဲ့ ရုရှားစစ်တပ်တို့ ဗျူဟာမြောက် ပူးတွဲလေကြောင်း ကင်းလှည့်တာ ၃ ကြိမ်မြောက်လည်း ဖြစ်ပါတယ်။

တရုတ်ဟာ ဂျပန်ပင်လယ်နဲ့ အရှေ့တရုတ်ပင်လယ်တွေထဲမှာ ရုရှားစစ်လေယာဉ် Tu-95MC ၂ စီးနဲ့အတူ ပူးတွဲဖွဲ့စည်းပုံကို ပုံဖော်ဖို့ H-6K လေယာဉ် ၂ စီးကို စေလွှတ်ခဲ့တယ်လို့ တရုတ် ကာကွယ်ရေးဝန်ကြီးဌာနက ပြောပါတယ်။

ခေတ်သစ်မှာ တရုတ်နဲ့ ရုရှား ဘက်စုံပူးပေါင်းဆောင်ရွက်မှု အပါအဝင် မဟာဗျူဟာမြောက် မိတ်ဖက်ဆက်ဆံရေးကို ပိုဖွံ့ဖြိုးတိုးတက်စေဖို့၊ ဗျူဟာမြောက် ညှိနှိုင်းဆောင်ရွက်မှုနဲ့ ပူးတွဲ ပူးပေါင်းဆောင်ရွက်နိုင်စွမ်းအဆင့်ကို တိုးမြှင့်ဖို့၊ ကမ္ဘာလုံးဆိုင်ရာ ဗျူဟာမြောက် တည်ငြိမ်ရေးကို ပူးတွဲ ထိန်းသိမ်းဖို့ ရည်မှန်းထားတယ်လို့ ဝန်ကြီးဌာနက ဆိုထားပါတယ်။