ပီရူးနိုင်ငံမြောက်ပိုင်းက ပေထရိုပီရူး ရေနံပိုက်လိုင်းနားမှာ ဆန္ဒပြသူတွေက ကုန်ကားတစီးကို နိုဝင်ဘာ ၁၉ ရက်မှာ မီးရှို့ခဲ့ပါတယ်။

ဆန္ဒပြသူတွေက အစိုးရကို ယဉ်ကျေးမှုဆွေးနွေးပွဲတွေ ပြန်စဖို့လည်း တောင်းဆိုလိုက်ပြီး အဝါဂျန် တိုင်းရင်းသားမျိုးနွယ်စုဝင်တွေဟာ အောက်တိုဘာလဆန်းကတည်းက သိမ်းပိုက်ထားတဲ့ အစိုး ရရေနံကုမ္ပဏီပိုင် ကုန်ကားကို လိုရေတိုပြည်နယ် နော်ပေရူအာနို ရေနံပိုက်လိုင်းရဲ့ရုံး အမှတ်၅ ထဲမှာ နိုဝင်ဘာ ၁၉ ရက် ညက မီးရှို့ခဲ့တာပါ။

လူ့အဖွဲ့အစည်းအတွင်း ကျန်းမာရေးနဲ့ ပညာရေး တိုးတက်ဖို့ စီမံကိန်းတွေ၊ ရေထုနဲ့ မြေထု ညစ်ညမ်းမှုတွေကို ဖယ်ရှားဖို့၊ ယဉ်ကျေးမှုဆိုင်ရာ ကိစ္စရပ်တွေကို အစိုးရနဲ့ ဆွေးနွေးဖို့ စတဲ့ အချက်တွေကို သူတို့က တောင်းဆိုနေခဲ့တာပါ။

တကယ်လို့ အစိုးရက ဆွေးနွေးပွဲတွေကို ၂၄ နာရီအတွင်း ပြန်မစရင် ရေနံပိုက်လိုင်းကနေ စက်ယန္တရားတွေကို ဖယ်ပစ်မယ်လို့လည်း ဆန္ဒပြသူတွေက ခြိမ်းခြောက်ခဲ့ကြပါတယ်။

ပေထရိုပီရူး အစိုးရ ရေနံကုမ္ပဏီကလည်း တိုင်းရင်းသား ခေါင်းဆောင်တွေက အစွန်းရောက် ဆောင်ရွက်ချက်တွေကို စွန့်လွှတ်ဖို့၊ တည်ငြိမ်အေးချမ်းပြီး အစိုးရ အဖွဲ့အစည်းတွေနဲ့ ဆွေးနွေးဖို့ လိုလားတဲ့ဆန္ဒကို ပြသကြဖို့ ကြေညာချက်ထဲမှာ ပြောပါတယ်။