ဆူဒန်ဝန်ကြီးချုပ်နှင့် စစ်တပ် သဘောတူညီမှုရခဲ့သည့်အပေါ် ပြည်သူများကန့်ကွက်ဆန္ဒပြ

ဆူဒန်နိုင်ငံမှာ လွန်ခဲ့တဲ့ တလက အာဏာသိမ်းမှုအတွင်း ရာထူးမှ ဖယ်ရှားခံခဲ့ရတဲ့ ၀န်ကြီးချုပ် အက်ဘ်ဒဲလ်လာဟမ်းဒေါ့ခ်ကို ပြန်လွှတ်ပေးဖို့ စစ်တပ်နဲ့သဘောတူညီမှု ရရှိခဲ့ပြီးနောက်မှာ စစ်ခေါင်းဆောင်တွေကို ဖိအားတွေပေးတဲ့အနေနဲ့ မြို့တော်ခါတွမ်နဲ့ တခြားမြို့တွေမှာ နိုဝင်ဘာ ၂၅ ရက်က ဆူဒန်ပြည်သူ ထောင်သောင်းချီ ဆန္ဒပြခဲ့ကြပါတယ်။
ဆန္ဒပြသူတွေဟာ မြို့တော်ခါတွမ်၊ ဆာဟာဖာရပ်ကွက်ရှိ လမ်းမကြီးကိုလည်း ပိတ်ထားခဲ့သလို တခြားမြို့တွေမှာလည်း ဆန္ဒပြခဲ့ကြပါတယ်။
ထင်ရှားတဲ့ နိုင်ငံရေးပါတီတွေနဲ့ ဆူဒန်ရဲ့အင်အားကြီး ဆန္ဒပြလှုပ်ရှားမှုတွေဟာ စစ်တပ်နဲ့ သဘောတူလက်မှတ် ရေးထိုးတဲ့ ဝန်ကြီးချုပ် ဟမ်းဒေါ့ခ်ရဲ့ ဆုံးဖြတ်ချက်ကို နိုဝင်ဘာ ၂၁ ရက်ကပဲ ဆန့်ကျင်ကြပြီး သူ့ကို သစ္စာဖောက်မှု သို့မဟုတ် အာဏာသိမ်းမှုအတွက် နိုင်ငံရေးအရ အကာ အကွယ်ပေးတာလို့ ဝေဖန်ကြပါတယ်။
ဟမ်းဒေါ့ခ်က ဘာအာဏာမှမရှိဘဲနဲ့ ဘာဆုံးဖြတ်ချက်တွေမှ မချဘဲ ပြန်လာခဲ့တာ လို့ ဆိုပါတယ်။ ပြည်သူတွေအပေါ် လုံခြုံရေးတပ်ဖွဲ့တွေရဲ့ ဖိနှိပ်မှုတွေက များပြားနေပြီး လမ်းမတွေပေါ်ကို မျက်ရည်ယိုဗုံးနဲ့ ပစ်နေတယ်လို့လည်း ဆန္ဒပြသူတွေက ပြောပါတယ်။
ဟမ်းဒေါ့ခ်ကို ရာထူးပြန်ပေးမှုဟာ စစ်ခေါင်းဆောင် အယ်လ်ဘာဟန်ရဲ့လိုက်လျောမှု တစ်ခုဖြစ်ပေမယ့်လည်း နိုင်ငံရေးမှာ စစ်တပ် မပါဝင်သင့်ကြောင်း အဓိကနိုင်ငံရေးပါတီတွေနဲ့ အရပ်ဘက်အဖွဲ့တွေက ပြောဆိုကြပါတယ်။
တနင်္ဂနွေနေ့ သဘောတူညီချက်အရ ဝန်ကြီးချုပ်ဟမ်းဒေါ့ခ်ဟာ ၂၀၂၃ ခုနှစ်အထိ တည်တံ့မယ့် နိုင်ငံရေးအကူးအပြောင်းကာလမှာ ပညာရှင်တွေပါဝင်တဲ့ အစိုးရကို ဦးဆောင်မှာဖြစ်ပြီး စစ်တပ်နဲ့ အာဏာခွဲဝေရမှာဖြစ်ပါတယ်။
ဆူဒန်အာဏာပိုင်တွေဟာ ဒီမိုကရေစီနဲ့လွတ်လပ်စွာ ထုတ်ဖော်ပြောဆိုခွင့်အတွက် ကတိပြုထားကြောင်း ဟမ်းဒေါ့ခ်က ပြောပါတယ်။