နယူးဇီလန်နိုင်ငံမှာ ဆေးလိပ်မသောက်တဲ့ မျိုးဆက် ဖြစ်လာစေရေးရည်ရွယ်ပြီး  လူငယ်တွေ သူတို့ဘဝတလျှောက် စီးကရက်ဝယ်ယူခြင်းမှ တားမြစ်မယ့် ဥပဒေတရပ်ပြဋ္ဌာန်းဖို့ စီစဉ်နေတယ်လို့ အစိုးရက  ကြေညာလိုက်ပါတယ်။

အဲဒီဥပဒေဟာ ကမ္ဘာပေါ်မှာ စီးကရက်သမားတွေအတွက် အပြင်းထန်ဆုံးနဲ့ ဆေးလိပ်ကုမ္ပဏီတွေအတွက် အနစ်နာဆုံးဖြစ်စေမှာဖြစ်ပြီး  နိုင်ငံအတွင်း ဆေးလိပ်ဖြတ်ရေး ကြိုးပမ်းချက်လည်း ဖြစ်ပါတယ်။

နယူးဇီလန် ကျန်းမာရေးဒုဝန်ကြီး အိုက်ရှာဗီရာလာက  “လူငယ်တွေ ဆေးလိပ် ဘယ်တော့မှ စမသောက်ဖို့၊ ဆေးလိပ်မသောက်တဲ့ မျိုးဆက် ဖြစ်လာစေဖို့ ကျမတို့ ဥပဒေလုပ်နေပါတယ်။ အသက် ၁၄ နှစ်အောက် ကလေးတွေကို ဆေးလိပ်ရောင်းရင် ပြင်းထန်တဲ့အရေးယူမှု ရှိလိမ့်မယ်။ အရွယ်ရောက်လာမယ့် အဲဒီအနာဂတ်မျိုးဆက်တွေ ဘယ်တော့မှ ဆေးလိပ်မဝယ်ဖို့ပါ၊ ငယ်စဉ်မှာ ဆေးလိပ်ကို မစမိစေဖို့ပါ” လို့ ပြောပါတယ်။

ဘူလ်တန်နိုင်ငံဟာ ကမ္ဘာပေါ်မှာ စီးကရက်ရောင်းချမှုကို လုံးဝတားမြစ်ထားတဲ့နိုင်ငံ ဖြစ်ပြီး၊ အခု နယူးဇီလန်က ဒုတိယ အတင်းကျပ်ဆုံးနိုင်ငံ ဖြစ်လာပြီး နယူးဇီလန်အစိုးရရဲ့ ကြေညာချက်ကို နိုင်ငံသားအများစုက ကြိုဆိုကြပါတယ်။