ထိုင်းနိုင်ငံမှာ ကိုဗစ်မျိုးကွဲသစ်  အိုမီခရွန်ပိုးတွေ့ရှိသူ ၁၁ ယောက်ရှိပြီး ၉ ယောက် အတည်ပြုကာ နောက်ထပ်သံသယလူနာ  ၃ ယောက်ကိုတော့ ထပ်မံအတည်ပြုဖို့ စစ်ဆေးနေဆဲလို့ ထိုင်းနိုင်ငံ ကုသရေးနဲ့ဆေးသိပ္ပံဦးစီးဌာန ညွှန်ကြားရေးမှူး ဒေါက်တာ ဆူဖကစ် ဆီရီလတ်စ်က ဒီမနက် သတင်းစာရှင်းလင်းပွဲမှာ ပြောပါတယ်။

ထိုင်းမှာ  နိုဝင်ဘာ ၁ ရက်ကစပြီး နိုင်ငံခြားကဝင်ရောက်လာသူတွေကို ကိုဗစ်-၁၉ စစ်ဆေးရာမှာ ကိုဗစ်-၁၉ ဗီဇပြောင်း ဒယ်လ်ဒါအမျိုးအစားက နမူနာ ၄၇၇၇ ခု အများဆုံးတွေ့ရှိပြီး အယ်လ်ဖာအမျိုးအစား ၈ ခု၊ ဘီတာအမျိုးအစား ၁ ခုနဲ့ အိုမီခရွန်အမျိုးအစား ၁၁ ခု တွေ့ရှိတယ်လို့ ဆိုပါတယ်။  

အဆိုပါ ၁၁ ယောက်စလုံးဟာ နိုင်ငံခြားမှ ဝင်ရောက်လာသူတွေဖြစ်ပြီး အမေရိကန်နိုင်ငံသား  ၂ ဦး၊ အင်္ဂလန်နိုင်ငံသား ၂  ဦး၊ ထိုင်းနိုင်ငံသား ၅ ဦး၊ ကိုလံဘီယာ ၁ ဦး၊    ဘဲလာရုစ်နိုင်ငံသား ၁ ဦး ပေါင်း ကျား ၉ ဦး မ ၂ ဦးတို့ပါဝင်ကြောင်း၊ သူတို့တွေဟာ စပိန်၊ နိုင်ဂျီးရီးယား၊ ဒီအာရ်ဂွန်ဂို၊ အင်္ဂလန်၊ တောင်အာဖရိက၊ အမေရိကန်နဲ့ ယူအေအီးနိုင်ငံတို့ကနေရောက်လာကြပြီး လက်ရှိ ဘန်ကောက်မှာ ၉ ဦး၊ နွန်ထပူရီမှာ ၁ ဦး နဲ့ ချွန်းပူးရီးခရိုင်ထဲမှာ ၁ ဦးရှိနေတယ်လို့ ဆိုပါတယ်။ 

အဆိုပါ ၁၁ ဦးထဲမှာ ၈ ဦးကို အတည်ပြုပြီး နောက်ထပ် ၃ ဦးကို ထပ်မံအတည်ပြုနိုင်ဖို့ စစ်ဆေးနေကြောင်း  ၃ ရက်အတွင်းအဖြေသိရမယ်လို့ ဒေါက်တာ ဆူဖကစ်က ပြောပါတယ်။ 

ထိုင်းနိုင်ငံရဲ့ ကိုဗစ်-၁၉ ကူးစက်မှုအခြေအနေကနော့ ဒီဇင်ဘာ ၁၄ ရက်မှာ  ပိုးတွေ့လူနာသစ် ၂၈၆၂ ဦး၊ သေဆုံး ၃၇ ဦး၊ သက်သာပျောက်ကင်းသူ ၄၈၁၈ ဦးရှိပါတယ်။ 

မနှစ်ကစ ဒီနေ့ထိ ပိုးကူးစက်ခံရသူပေါင်း ၂၁၇၄၉၀၆ ၊ သက်သာ ပျောက်ကင်းသူ ၂၁၀၆၁၄၄ ၊  သေဆုံးသူ ၂၁၂၃၁ ရှိတယ်လို့ ထိုင်းနိုင်ငံ ကိုဗစ်-၁၉ အခြေအနေစီမံကွပ်ကဲရေးဗဟိုဌာနက ထုတ်ပြန်ထားပါတယ်။ 

ကိုးကား - ထိုင်းနိုင်ငံကိုဗစ် ၁၉ အချက်အလက်စင်တာ