အီရတ်နိုင်ငံမြောက်ပိုင်း ကိုယ်ပိုင်အုပ်ချုပ်ခွင့်ရ ကာဒစ်စတန်ဒေသ မြို့တော် Erbil မှာ ဒီဇင်ဘာ ၁၇ ရက်က မိုးသည်းထန်စွာ ရွာသွန်းမှုကြောင့် ရုတ်တရက် ရေကြီးပြီး အနည်းဆုံး လူ ၈ ဦး သေဆုံးခဲ့ကြောင်း  အီရတ်ကာ့ဒ်အာဏာပိုင်တွေက ပြောကြားခဲ့ပါတယ်။ 

မြို့တော် Erbil ရဲ့တောင်ဘက် ဝေးလံခေါင်သီတဲ့ဒေသတွေမှာ မိုးသည်းထန်စွာ ရွာသွန်းမှုကြောင့်  လူ ၃ ဦး ပျောက်ဆုံးနေတယ်လို့လည်း ကာ့ဒ်အရပ်ဘက် ကာကွယ်ရေးအဖွဲ့တွေက ပြောပါတယ်။ 

အင်အားပြင်း မုန်တိုင်းမိုးရေတွေ မနက်အစောပိုင်း ၄ နာရီမှာ နေအိမ်တွေထဲ ဝင်လာတာကြောင့်  စတင်ရေကြီးခဲ့ပြီး အမျိုးသမီးနဲ့ ကလေးတွေအပါအဝင် ၈ ဦး သေဆုံးခဲ့ကာ လူအများအပြားလည်း နေအိမ်တွေကို စွန့်ခွာခဲ့ရတယ်လို့လည်း ဆိုပါတယ်။ 

သေဆုံးသူ ၈ ဦးထဲက တစ်ဦးဟာ မိုးကြိုးထိလို့ သေဆုံးခဲ့ပြီး ကျန်တဲ့သူတွေကတော့ သူတို့ နေအိမ်တွေထဲမှာ ရေနစ်သေဆုံးခဲ့တာဖြစ်ကြောင်း အရပ်ဘက် ကာကွယ်ရေး ပြောရေးဆိုခွင့်ရှိသူ ဆာကော့တ်ကရက်ခ်ျက ပြောပါတယ်။ 

ပျောက်ဆုံးနေသူတွေကို ရှာဖွေမှုနေပြီး သေဆုံးသူဦးရေ တိုးလာနိုင်တယ်လို့ သတိပေး ပြောကြားထားပါတယ်။ 

အထူးသဖြင့် Erbil မြို့ အရှေ့ဘက်က အလုပ်သမားလူတန်းစားခရိုင်မှာ သိသိသာသာ ပျက်စီးခဲ့ပါတယ်။ အရပ်ဘက်ကာကွယ်ရေးအဖွဲ့မှ လိုက်ပါလာတဲ့ အဖွဲ့ဝင် ၄ ဦး ဒဏ်ရာရရှိခဲ့ပြီး သူတို့ရဲ့ကား မျောပါသွားတယ်လို့လည်း ဆိုပါတယ်။ 

အီရတ်နိုင်ငံမှာ ပြင်းထန်တဲ့ ရာသီဥတုဖြစ်စဉ်တွေ ဆက်တိုက် ဖြစ်ပွားနေတာပါ။ 

ဒီဇင်ဘာ ၁၆ ရက်နေ့က ထုတ်ပြန်တဲ့ လေ့လာမှုတစ်ခုမှာ အီရတ်နိုင်ငံရဲ့ မိုးခေါင်ရေရှားမှုဒဏ်ခံရတဲ့ ဒေသတွေမှာ နေထိုင်တဲ့ မိသားစုတွေရဲ့ ထက်ဝက်လောက်ဟာ လူသားချင်း စာနာထောက်ထားမှု ဆိုင်ရာ အစားအစာအကူအညီ လိုအပ်နေတယ်လို့  NRC က ပြောကြားခဲ့ပါတယ်။ 

ရာသီဥတုဖောက်ပြန်မှုကြောင့် အီရတ်ဟာ ၂၀၅၀ ခုနှစ်မှာ ရေအရင်းအမြစ် ၂၀ ရာခိုင်နှုန်း ကျဆင်းသွားနိုင်ကြောင်း ကမ္ဘာ့ဘဏ်က နိုဝင်ဘာလတုန်းက သတိပေးချက်ထုတ်ပြန်ခဲ့ပါတယ်။