ပရီးမီးယားလိဂ်အသင်းတွေမှာ ကိုဗစ်-၁၉ ရောဂါ ပျံ့နှံ့တွေ့ရှိခဲ့ပေမယ့် ပြိုင်ပွဲကို ဆက်လက်ကျင်းပဖို့ တာဝန်ရှိသူတွေက ဆုံးဖြတ်ခဲ့ပါတယ်။

ကိုဗစ်ပျံ့နှံ့မှုနဲ့ ပတ်သက်ပြီး ပွဲစဉ်တွေ ဆက်လက်ကျင်းပမလားဆိုတာကို  မနေ့က ကလပ်အသင်းတွေနဲ့ လိဂ်တာဝန်ရှိသူတွေ ဆွေးနွေးခဲ့ကြတာပါ။ 

ကလပ်အသင်းတွေကြားမှာ ကိုဗစ်ရောဂါပိုးပျံ့နှံ့မှုကို ကိုင်တွယ်ပုံနဲ့ စိန်ခေါ်မှုတွေအကြောင်း ဆွေးနွေးခဲ့ကြောင်း ပရီးမီးယားလိဂ်က အတည်ပြုခဲ့ပြီး စုပေါင်းအားနဲ့ ဆက်လက်ကျော်ဖြတ်ကြဖို့ ဆုံးဖြတ်ခဲ့တယ်လို့ သတင်းထုတ်ပြန်ပါတယ်။

ကစားသမားတွေရဲ့ ကျန်းမာရေးက အမြဲတမ်းဦးစားပေးဖြစ်ပြီး ပြည်သူ့ကျန်းမာရေးအဖွဲ့ရဲ့ လမ်းညွှန်ချက်တွေနဲ့အညီ ပြိုင်ပွဲကို  ဆက်လက်ကျင်းပသွားမယ်လို့လည်း ပါရှိပါတယ်။

ကလပ်အသင်းတချို့ကတော့ ခရစ္စမတ်ကာလ ပွဲစဉ်တချို့ကို ရွှေ့ဆိုင်းဖို့ ဆန္ဒရှိခဲ့ပေမဲ့ အားလုံးသဘောတူညီမှုနဲ့ ဆက်လက်ကျင်းပဖို့ ဆုံးဖြတ်ခဲ့တာဖြစ်ပြီး နှစ်ပတ်အတွင်း ပြန်လည်သုံးသပ်မယ်လို့ ဆိုပါတယ်။ 

ပြီးခဲ့တဲ့တစ်ပတ်က ကိုဗစ်ပျံ့နှံ့မှုတွေကြောင့် ပရီးမီးယားလိဂ် ပွဲစဉ် ၁ဝ ပွဲမှာ ၆ ပွဲအထိ ရွှေ့ဆိုင်းခဲ့ရပါတယ်။