ပိုချက်တီနိုကို မန်ယူနည်းပြသစ်အဖြစ်ခန့်အပ်ရန် ဂယ်ရီနဗီးလ် ထပ်မံတိုက်တွန်း

မန်ယူနိုက်တက်အနေနဲ့ ပီအက်စ်ဂျီနည်းပြပိုချက်တီနိုကို နည်းပြချုပ်ရာထူးအတွက် တာဝန်ပေးသင့် တယ်လို့ ဂယ်ရီနဗီးလ်က တိုက်တွန်းသွားပါတယ်။
မန်ယူအသင်းကို လက်ရှိနည်းပြ ရက်ဖ်ရင်းနစ်ခ်က ရာသီကုန်အထိ ယာယီနည်းပြအနေနဲ့ တာဝန်ယူနေတာဖြစ်ပြီး နည်းပြသစ်တစ်ဦးခန့်ဖို့ မန်ယူအသင်းက ရှာဖွေနေဆဲဖြစ်ပါတယ်။
အသင်းနောက်ခံလူဟောင်း နဗီးလ်ကတော့ ပိုချက်တီနိုဟာ မန်ယူနည်းပြရာထူးနဲ့ အသင့်တော်ဆုံးဖြစ်ပြီး လူငယ်တွေကို အရောင်တင်ပေးရာမှာ ထူးချွန်သူဖြစ်တယ်လို့ ထောက်ခံချက်ပေးသွားတာပါ။
“ယူနိုက်တက်အနေနဲ့ မှန်ကန်သင့်တော်တဲ့ မန်နေဂျာတစ်ဦးကို ရာသီအကုန်မှာခန့်အပ်ပြီး ရေရှည်အစီအစဉ်တစ်ခု ချမှတ်ရပါမယ်။ အမြဲတမ်းနည်းပြအနေနဲ့ ပိုချက်တီနိုကို ခန့်အပ်စေချင်တယ်။ ဘာဖြစ်လို့လဲဆိုတော့ သူက ဒီလိဂ်နဲ့အတွေ့အကြုံရှိပြီးသားဖြစ်တယ်။ ကစားကွက် ကောင်းမွန်အောင် သူ လုပ်နိုင်မယ်လို့ထင်တယ်။ ပြီးတော့ သူက နာမည်ကြီးကြယ်ပွင့်တွေကို အရောင်တင်ပေးနိုင်တဲ့ စရိုက်လက္ခဏာနဲ့ ကိုယ်ရည်ကိုယ်သွေးရှိတယ်” လို့ နဗီးလ်က ပြော ပါတယ်။
ပိုချက်တီနိုအနေနဲ့ ပီအက်စ်ဂျီနဲ့ အောင်မြင်မှုရခဲ့မယ်ဆိုရင်တော့ ကလပ်ဘက်က လက်လွှတ် ပေးဖို့မရှိကြောင်းလည်း နဗီးလ်က သုံးသပ်သွားပါတယ်။