ထိုင်းနိုင်ငံမှာ ဝက်တွေအမြောက်အမြားသေဆုံးနေတာနဲ့ ပတ်သက်ပြီး လူမှုကွန်ရက်မှာ အာဖရိကဝက်တုပ်ကွေး ASF ကြောင့်လို့ ပြောဆိုနေတာ ကြာပြီဖြစ်ပေမယ့်  သက်ဆိုင်ရာကတော့ ဇန်နဝါရီ ၁၁ ရက်ကမှ ပိုးတွေ့ကြောင်း တရားဝင် အတည်ပြု ထုတ်ပြန်ကြေညာပါတယ်။ 

ဝက်တွေသေဆုံးရတဲ့အပေါ် တိရစ္ဆာန်မွေးမြူရေးဦးစီးဌာနအနေနဲ့ အချိန်ကာလတစ်ခုယူပြီး စမ်းသပ်စစ်ဆေးခဲ့ကြောင်း၊ ဝက်မွေးမြူရေးခြံပေါင်း ၁၀ နေရာက နမူနာစ ၃၀၅ ခု နဲ့ သား သတ်ရုံပေါင်း ၂ ခုက နမူနာစ ၄ ခု စုစုပေါင်း ၃၀၉ ခု ဓာတ်ခွဲစစ်ဆေးရာမှာ ASF အာဖရိကဝက်တုတ်ကွေးရောဂါပိုး Positive  နမူနာ ၁ ခု တွေ့ကြောင်း၊ အဆိုပါနမူနာဟာ နခွန်းပထုံမြို့နယ် သားသတ်ရုံတစ်ခုကဖြစ်တယ်လို့ ထိုင်းနိုင်ငံတိရိစ္ဆာန်မွေးမြူရေးဦးစီးဌာန ညွှန်ကြားရေးမှူးလည်းဖြစ် ၊ ASF နဲ့ တိရစ္ဆာန်ကူးစက်ရောဂါ သုတေသနအဖွဲ့ဥက္ကဋ္ဌဖြစ်တဲ့ တိမွေး ကုဆရာဝန်ဒေါက်တာ ဆရဝစ်ထာနိတိုးက မနေ့က သတင်းစာရှင်းပွဲမှာ ပြောပါတယ်။ 

ဒါကြောင့် ရောဂါပိုးနှိမ်နင်းကာကွယ်ရေးအတွက် သက်ဆိုင်ရာအဖွဲ့နဲ့ ချိတ်ဆက်ဆောင်ရွက်နေပြီး အဆိုပါသားသတ်ရုံဧရိယာကိုလည်း  ထိန်းချုပ်နယ်မြေသတ်မှတ်ကာ မြို့နယ်ထဲက ဝက်တွေ ကို ၅ ကီလိုမီတာထက်ကျော်လွန်ပြီးတော့ ရွေ့လျားသယ်ဆောင်ခွင့်မပြုဘူးလို့ ဆိုပါတယ်။ 

စစ်ဆေးချက်အရ ASF ရောဂါပိုးဟာ ဝက်တွေမှာပဲ ကူးစက်ပြီး လူနဲ့တခြားတိရစ္ဆာန်ဆီ ကူးစက်မှုမရှိကြောင်း၊ စားသုံးသူတွေအနေနဲ့တော့ ဝက်သားကို အပူချိန် ၇၀ ဒီဂရီစင်တီဂရိတ်ထက်ပိုပေးပြီးမှ စားသင့်တယ်လို့ ဆိုပါတယ်။ 

ဒီကိစ္စနဲ့ ပတ်သက်ပြီး အတိုက်အခံပါတီဖြစ်တဲ့ Move Forward Party နဲ့ Pheu Thai Party တို့ကတော့ ဝက်တွေအမြောက်အမြားသေဆုံးခဲ့တာကို နမူနာ  ၁ ခုဘဲ ကူးစက်တဲ့အပေါ် အယုံ အကြည်မရှိကြောင်း၊ ဝက်ကူးစက်ရောဂါပြဿနာဖြစ်နေတာဟာ မနှစ်ဧပြီလကတည်းကဖြစ်ပြီး ထိုင်း အိမ်နီးချင်းနိုင်ငံတွေမှာလည်း ပြန့်ပွါးနေတာကို စစ်ဆေးကာကွယ်မှုမပြုဘဲ လျစ်လျူရှုခဲ့တာလို့ ဝေဖန်ပြောပါတယ်။

အောက်ခြေအဖွဲ့အစည်းရဲ့ တင်ပြချက်ကို အရေးတယူမဆောင်ရွက်တာ၊ သတင်းမှန်ကိုထိန်ချန်ထားတာ၊ ဝက်သားဈေးတက်လို့ တခြားကုန်ပစ္စည်းတွေပါ ဈေးလိုက်တက်နေတာ ပြည်သူ့အခက်အခဲကို မျက်ကွယ်ပြုနေတာတွေအတွက် အစိုးရမှာ တာဝန်ရှိပြီး အရေးယူပေးဖို့ အဂတိလိုက်စားမှုနှိမ်နင်းရေးဌာနကိုတိုင်ကြားမယ့်အကြောင်း၊   တိရစ္ဆာန်မွေးမြူရေး ဌာနအနေနဲ့ တိရစ္ဆာန်ကူးစက်ပိုးနှိမ်နင်းရေး ရန်ပုံငွေရသုံးစာရင်းတွေ ပွင့်လင်းမြင်သာချပြဖို့ ပါတီပြောခွင့်ရတွေက  မနေ့က သတင်းစာရှင်းပွဲမှာ ပြောကြားခဲ့ပါတယ်။ 

ထိုင်းအစိုးရအနေနဲ့ ASF ဝက်ကူးစက်ရောဂါနှိမ်နင်းရေး၊ ကာကွယ်ထိန်းချုပ်ရေးနဲ့ နစ်နာ ဆုံးရှုံးမှုတွေအပေါ်ထောက်ပံ့ဖို့ ဝန်ကြီးချုပ်လမ်းညွှန်ချက်နဲ့  ရန်ပုံငွေ ဘတ်သန်းပေါင်း ၅၇၄ ဘတ် ခွင့်ပြုကြောင်း အစိုးရအိမ်တော် ပြောရေးဆိုခွင့်ရှိသူ နိုင်းထနကွန်း ဘန်းကွန်းခုန်းခနက  ပြောပါတယ်။ 

မနှစ် မတ်လ ၂၃ မှ အောက်တိုဘာ ၁၅ ရက်နေ့အထိ ဝက်ကူးစက်ရောဂါမပြန့်ပွါးရေးအတွက် ခရိုင်ပေါင်း ၅၀ က ဝက်အကောင်ရေပေါင်း ၁၅၉၄၅၃ ကောင်ကို သုတ်သင်ခဲ့ကြောင်း ၊ နစ်နာကြေး မရသေးတဲ့ ပိုင်ရှင်ပေါင်း ၄၉၄၁ ဦးရှိကြောင်း အစိုးရကထုတ်ပြန်ပါတယ်။ 

ထိုင်းနိုင်ငံမှာ ဝက်သားကို အသွင်အမျိုးမျိုးထုတ်လုပ်တင်ပို့ရောင်းချပြီး ပြည်သူတွေကလည်း တွင်ကျယ်စွာစားသုံးတဲ့အတွက် ဝက်ဈေးတက်တာ ၊ တခြား ကြက်၊ ဘဲနဲ့ မွေးမြူရေး ထုတ်ကုန်ပစ္စည်းတွေလည်း ဈေးလိုက်တက်နေတာဟာ  ပြဿနာကြီးတစ်ခုဖြစ်နေတာပါ။

Ref: Thairath