ထိုင်းနိုင်ငံမှာ ဝက်တွေ ကူးစက်ရောဂါကြောင့် သေဆုံးကုန်လို့ ဝက်သားတွေ ရှားပါးပြီး ဈေးကြီးလာချိန်မှာ  မိကျောင်းသားကို စားသုံးလာကြသူတွေ အရင်ကထက်ပိုများလာနေတယ်လို့ ထိုင်းသတင်းတွေမှာ ဖော်ပြပါတယ်။ 

ထိုင်းမှာ လက်ရှိ ဝက်သားဈေး ၁ ကီလိုကို ၂၃၀ - ၂၅၀ ဘတ်အထိ ရှိနေပြီး မိကျောင်းသားကတော့ လက်လီဈေး ၁ ကီလို ၁၀၅ ဘတ်၊ လက္ကားဈေး ၃ ကီလိုအထက်ယူရင် ၁ ကီလို ဘတ် ၇၀ ဈေးသာရှိလို့  မိကျောင်းသားကို စားသုံးလာကြတာလို့ ဆိုပါတယ်။ 

မိကျောင်းသားကို ဝက်သား၊ ကြက်သားတွေနည်းတူ ဟင်းအဖြစ် ချက်ပြုတ်စားသုံးတာ၊ အနောက်တိုင်းအစားအစာလို အကင်အမျိုးမျိုး၊ မိကျောင်းပေါင်သား၊ ဗိုက်သားကင်၊ တကောင်လုံးကင် စတာတွေအပြင် ကွေ့သယို၊ ခေါက်ဆွဲတွေမှာပါ ထည့်စားခြင်း၊ မိကျောင်းသားရေပွခြောက်ကြော် စသဖြင့် အမျိုးမျိုး စီမံပြုလုပ် စားသုံးကြပါတယ်။  

မိကျောင်းသားကို ၃ ကီလိုအထက်ယူရင် ၁ ကီလို ဘတ် ၇၀၊ ၃ ကီလိုအောက် ၁ ကီလို ၁၀၅ ဘတ်၊ ရေခဲရိုက် ၁ ထုပ် ၉၀ ဘတ်၊  တကောင်လုံးအရေခွံချွတ် ၈၀၀ ဈေးနဲ့ အရေခွံပါပါရင်တော့ ဘတ် ၂၀၀၀ မှ ၃၀၀၀ ဈေးရှိတယ်လို့ နခွန်းပထုန်မြို့နယ်ရှိ မိကျောင်းမွေးမြူရေးခြံပိုင်ရှင် ၁ ဦးက ထိုင်းရတ်သတင်းဌာနကို ပြောပါတယ်။ 

မိကျောင်းမှာ သူ့ခန္ဓာအစိတ်အပိုင်းအကုန် အသုံးဝင်ကြောင်း၊ မိကျောင်းရဲ့ သားရေခွံကို လက်ပွေ့အိတ်၊ ပိုက်ဆံအိတ်၊ ခါးပတ်၊ ဖိနပ်၊ ဂျာကင်အင်္ကျီ စတဲ့လူသုံးကုန်ပစ္စည်းတွေ ထုတ်လုပ်နိုင်တဲ့အပြင် မိကျောင်းရဲ့ လက်သည်း ခြေသည်းတွေဟာ ဆေးဘက်ဝင်ကြောင်း၊ မိကျောင်းရဲ့ သွေးကိုတော့ ဆေးဝါးထဲ့တဲ့အခွံ (capsule) အဖြစ် အသုံးပြုပြီး မိကျောင်းဥကိုလည်း ကြက်ဥ၊ ဘဲဥလို စားလို့ရတယ်လို့ မိကျောင်းခြံပိုင်ရှင်က ပြောပါတယ်။ 

ထိုင်းအရှေ့မြောက်ပိုင်း ဥဒွန်းဌာနီမြို့က ခွန်နိယုမ်းဆိုသူအမျိုးသားတစ်ဦးကလည်း သူဟာ အရင်က မိကျောင်းနဲ့ပတ်သက်တဲ့ ကုန်ပစ္စည်းအမျိုးမျိုးထုတ်လုပ်တဲ့ကုမ္ပဏီမှာ အလုပ်လုပ်ခဲ့ပြီး မိကျောင်းတကိုယ်လုံး အသုံးဝင်ပုံကို ကောင်းကောင်းသိနေခဲ့ကြောင်း၊ ကိုဗစ်-၁၉ ရောဂါ ထိုင်းကို ရောက်လာတဲ့နောက်ပိုင်း ကုန်ပစ္စည်းတွေ ရောင်းမကောင်းလို့ အလုပ်လက်မဲ့ဖြစ်ပြီး မိကျောင်းသား အကင်ဆိုင်ဖွင့်ခဲ့တယ်လို့ ဆိုပါတယ်။ 

သူ့ဆိုင်မှာ မိကျောင်းသားအကင်၊ အကြော်၊ နေလှန်းသား စတာတွေကို အစပ်၊ အချဉ်၊ အချို၊ ပီဇာအရသာ၊ မာလာအရသာ စသဖြင့် အမျိုးစုံရနိုင်သလို ရေခဲစိမ်ပြီး တခြားဒေသကိုလည်း ပို့ပေးကြောင်း၊ စားဖူးသူတိုင်းက စွဲမက်ပြီး နောက်ထပ်လာစားကြောင်း၊ ဝက်သားတွေ ဈေးတက်လာတော့ ပိုပြီးရောင်းကောင်းလာတယ်လို့ Amarin TV ကို ပြောပါတယ်။ 

မိကျောင်းသားရဲ့ အာဟာရတန်ဖိုးနဲ့ပတ်သက်ပြီး စိုက်ပျိုးရေးသိပ္ပံတက္ကသိုလ် သုတေသနဌာန ကထိကတစ်ဦးက ဝက်သားမှာ ပရိုတင်း ၂၇ ဒသမ ၃၂  ဂရမ်ရှိရင် မိကျောင်းသားမှာ ၂၁ ဒသမ ၅ ဂရမ်၊  ဝက်သားမှာ အဆီ ၁၃ ဒသမ ၉ ဂရမ်ရှိရင် မိကျောင်းသားမှာ ၂ ဒသမ ၉ ဂရမ်၊ စွမ်းအင်ဓာတ်က ဝက်သားမှာ ၂၄၂ ဂရမ်ရှိရင် မိကျောင်းမှာ ၁၁၀ ဂရမ် ပါဝင်တယ်လို့ ပြောပါတယ်။ 

မိကျောင်းသား စားသုံးသူတစ်ဦးကလည်း မိကျောင်းသားအရသာဟာ ကြက်သားလိုလို၊ ငါးလိုလို နူးညံ့ကြောင်း၊ သူ့မှ အဆီပါဝင်မှုနည်းပြီး ပရိုတင်း(အသားဓာတ်)မြင့်ကာ ကိုယ်ခံအားကို မြင့်မားစေကြောင်း၊ ဒါပေမဲ့ မိကျောင်းက ရုပ်ဆိုးတော့ စားခါနီးအချိန်မှာ သူ့ရုပ်သွင်ပြင်ကို ခဏမေ့ထားသင့်တယ်လို့ ပြောသွားပါတယ်။ 

ကိုးကား- DaiyNews