မကွေးတိုင်း ဂန်ဂေါမြို့နယ် စမ်းမြို့ရွာကို ဇန်နဝါရီ ၁၈ ရက်နေ့ ညနေပိုင်းမှာ စစ်ကောင်စီတပ်တွေက မီးရှို့ဖျက်ဆီးနေတယ်လို့ ဒေသခံတွေဆီကနေ သိရပါတယ်။

စမ်းမြို့ကျေးရွာကို စစ်ကောင်စီတပ်တွေနဲ့ ပျူစောထီးအဖွဲ့ အင်အား ၄၀ လောက်ဝင်ရောက်ပြီး ပြည်သူတွေရဲ့ နေအိမ်တွေကို ဒီကနေ့ ညနေ ၃ နာရီခွဲလောက်မှာ မီးရှို့ ဖျက်ဆီးနေကြတယ်လို့ ဒေသခံတစ်ယောက်က ပြောပါတယ်။

“မီးက အခု ၅ နာရီကျော်တဲ့အထိ လောင်နေတုန်းပဲဗျ။ အဝေးကနေ မီးခိုးလုံးတွေ မီးတောက်တွေကို လှမ်းမြင်နေရတယ်။ စစ်ကောင်စီတပ်တွေ ရှိနေသေးတာကြောင့် ဘယ်သူမှလည်း သွားမငြှိမ်းရဲကြဘူး။ စစ်ကောင်စီတပ်တွေကတော့ တစ်ရွာလုံး ကုန်အောင် မီးရှို့ပစ်မယ်လို့ ကြိမ်းဝါးနေတယ်” လို့ ဆိုပါတယ်။

ဟံသာဝတီနဲ့ မြောက်ခင်ရမ်းရွာကနေ စစ်ကောင်စီတပ်သားတွေနဲ့ ပျူစောထီးတွေလည်း ၅ နာရီကျော်လောက်မှာ စမ်းမြို့ရွာဘက်ကို စစ်ကူအင်အားဖြည့်ဖို့ ထပ်လိုက်လာကြတယ်လို့ ပြောပါတယ်။

စမ်းမြို့ရွာကို ဒီဇင်ဘာ ၂၂ ရက်နေ့ကလည်း စစ်ကောင်စီတပ်တွေနဲ့ ပျူစောထီးအင်အား ၁၅၀ လောက်က မီးရှို့ဖျက်ဆီးတာကြောင့် နေအိမ် ၃၀ ကျော်လောက် မီးလောင်ကျွမ်းခဲ့တယ်လို့ သိရပါတယ်။

စစ်ကောင်စီတပ်တွေ ဖမ်းဆီးနှိပ်စက်မှာကို ကြောက်ပြီး စမ်းမြို့ကျေးရွာမှာ အိမ်ခြေ ၂၀၀ ကျော်လောက်နဲ့ အနီးပတ်ဝန်းကျင် ကျေးရွာ ၆ ရွာက ဒေသခံပြည်သူတွေလည်း ဘေးလွတ်ရာကို ထွက်ပြေးတိမ်းရှောင်နေရတာကြောင့် စားနပ်ရိက္ခာ၊ ဆေးဝါးနဲ့ အဝတ်အထည်တွေ အကူအညီ လိုအပ်နေတယ်လို့ သိရပါတယ်။