လက်စတာအသင်းလူစာရင်းကို ကြီးမားတဲ့ အပြောင်းအလဲတခု လုပ်ဆောင်ဖို့ လိုအပ်နေပြီလို့ နည်းပြ ဘရန်ဒန်ရော်ဂျာက ပြောသွားပါတယ်။ 

လက်စတာအသင်းဟာ ပြီးခဲ့တဲ့ ဇန်နဝါရီ အပြောင်းအရွှေ့မှာ ဗဟိုနောက်ခံလူသစ်ခေါ်ယူဖို့ လိုအပ်ပေမယ့် ကစားသမားသစ်တဦးမှ ခေါ်ယူနိုင်ခြင်းမရှိခဲ့ပါဘူး။ 

အဲဒီအတွက် လာမယ့်နှစ်အတွက်တော့ ကစားသမားစာရင်းကို ကြီးမားတဲ့ အပြောင်းအလဲ လုပ်ဆောင်ဖို့ လိုအပ်တယ်လို့ နည်းပြရော်ဂျာက ပြောပါတယ်။ 

“ဇန်နဝါရီမှာ လူသစ်ခေါ်ရတာက ခက်ပါတယ်။ လာမယ့်နွေရာသီမှာတော့ ကစားသမားသစ်တွေ ခေါ်ယူဖို့လိုတယ်ဆိုတာ သံသယဖြစ်စရာမရှိပါဘူး။ ၃ နှစ်လောက် အတူအလုပ်လုပ်ခဲ့ကြပြီးပြီဆိုတော့ လူစာရင်းကို ပြန်လည်အားသစ်လောင်းဖို့ လိုအပ်ပါတယ်။” 

လက်စတာအသင်းဟာ အခုနှစ်ရာသီမှာ ဒဏ်ရာပြဿနာတွေကြောင့် ရုန်းကန်နေရပြီး ပွဲစဉ် ၂ဝ ကစားအပြီးမှာ အမှတ်ပေးဇယားအဆင့် ၁ဝ နေရာမှာပဲ ရပ်တည်နေပါတယ်။