မဒါဂက်စ်ကာနိုင်ငံသို့ အမ်နာတီဆိုင်ကလုန်းမုန်တိုင်း ဝင်ရောက်
အာဖရိကတိုက် အရှေ့ဘက် အိန္ဒိယ သမုဒ္ဒရာအတွင်း ကျွန်းနိုင်ငံဖြစ်တဲ့ မဒါဂက်စ်ကာ နိုင်ငံကို အမ်နာတီ ဆိုင်ကလုန်း မုန်တိုင်းက ၁ နာရီ ၈၄ မိုင် လေတိုက်နှုန်းနဲ့ ဖေဖော်ဝါရီ ၂၃ ရက်မှာ တိုက်ခတ်ရင်း ကုန်းတွင်း ဝင်ရောက်ခဲ့ပါတယ်။
ဒါဟာ ၁ လအတွင်း ဝင်ရောက် တိုက်ခတ်ခဲ့တဲ့ လေးကြိမ်မြောက် အကြီးစားမုန်တိုင်းပါ။
အမ်နာတီ ဆိုင်ကလုန်းမုန်တိုင်းဟာ ကျွန်းရဲ့ အရှေ့တောင်ဘက်ကနေ ကုန်းတွင်းကို ဝင်ရောက် တိုက်ခတ်ခဲ့တာပါ။
မုန်တိုင်းမဝင်ခင်တည်းက မုန်တိုင်းလမ်းကြောင်းမှာရှိတဲ့ လူအယောက် ၃ သောင်းကျော်ကို ဘေးလွတ်ရာ ရွှေ့ထားနိုင်ခဲ့တယ်လို့ အစိုးရ ကပ်ဘေးနဲ့ဘေးအန္တရာယ်စီမံခန့်ခွဲရေးရုံးက ဖေဖော်ဝါရီ ၂၂ ရက်မှာ ပြောပါတယ်။
ဒါပေမယ့် မုန်တိုင်းဟာ ဖေဖော်ဝါရီ ၂၃ ရက်နေ့ နှောင်းပိုင်းမှာ လေတိုက်နှုန်းက ၁ နာရီ ၆၂ မိုင်ထိ ကျဆင်းသွားလို့ အပူပိုင်းမုန်တိုင်းအဖြစ် အဆင့်လျော့ကျခဲ့ပါတယ်။ ထိခိုက်ပျက်စီးမှု အခြေအနေကိုတော့ မသိရသေးပါဘူး။
လွန်ခဲ့တဲ့ ၃ ပတ်က ဒီကျွန်းနိုင်ငံကို ဆိုင်ကလုန်းမုန်တိုင်း ဘတ်စီရိုင် ဝင်ရောက်တိုက်ခတ်လို့ လူ ၁၂၄ ယောက်ထက် မနည်း သေဆုံးခဲ့ပြီး အိမ်ခြေ ၁ သိန်း ၂ သောင်း ၄ ထောင် ပျက်စီးခဲ့တာပါ။
အရင်အပတ်က ဒူမာကို မုန်တိုင်း ဝင်ရောက်တိုက်ခတ်လို့ လူ ၁၄ ယောက်ထက် မနည်း သေဆုံးပြီး လူအယောက် ၄၃၀၀ ကို ဘေးကင်းရာ ရွှေ့ပေးခဲ့ရတယ်လို့ ကပ်ဘေးသက်သာရေး အေဂျင်စီက ပြောပါတယ်။
အပူပိုင်းမုန်တိုင်း ကလစ်ဖ်က မဒါဂတ်စ်ကာကို မဝင်ခဲ့ပေမယ့် အဖျားခတ်ခဲ့ပြီး အပူပိုင်းမုန်တိုင်း အန်နာကတော့ ဇန်နဝါရီ ၂၂ ရက်မှာ ကျွန်းပေါ်ကို ဖြတ်သန်းတိုက်ခတ်ခဲ့ပါတယ်။
အပူပိုင်း ဆိုင်ကလုန်းမုန်တိုင်းတွေရဲ့ ပြင်းအားက ပိုတိုးလာမယ်လို့ ကုလသမဂ္ဂ လက်အောက်ခံ ရာသီဥတု ပြောင်းလဲမှု ဆိုင်ရာ အစိုးရများအဖွဲ့က ခန့်မှန်းထားပါတယ်။
