ထိုင်းနိုင်ငံမှာ လာမယ့်   ဆုန်ကရန် သင်္ကြန်ပွဲတော် ကာလအထိ နေ့စဉ် ကိုဗစ်-၁၉ ကူးစက်မှု နှုန်း ၁ သိန်းထိ အဆိုးဝါးဆုံးအခြေအနေမှာ ရှိလာနိုင်တယ်လို့  ရောဂါထိန်းချုပ်ရေးဌာန (ဒီဒီစီ)က ခန့်မှန်း ပြောတဲ့အကြောင်း ဘန်ကောက်ပို့စ်သတင်းမှာ ရေးပါတယ်။

လာမယ့် သီတင်းပတ်တွေထဲမှာ ရောဂါကူးစက်မှုအဆင့်တွေ လျော့ကျလာမလား၊ ဒါမှမဟုတ် ပြင်းထန်လာမလားဆိုတာကတော့ ကိုဗစ်-၁၉ ရောဂါကူးစက်ပျံ့ပွားမှု ကြိုတင်ကာကွယ်မှုတွေ ဘယ်လိုတင်းကျပ်ချမှတ်ထားမလဲဆိုတဲ့အပေါ် မူတည်တယ်လို့ ဒီဒီစီက ဆိုပါ တယ်။

ရောဂါကူးစက်ပျံ့ပွားမှု ကြိုတင်ကာကွယ်ထိန်းချုပ်ရေးဆိုင်ရာ လုပ်ဆောင်ချက်တွေထဲမှာတော့ လူစုလူဝေးနဲ့ လုပ်ဆောင်ရတာတွေကို ပြန်လည်ခွဲခြားတာ၊ နေအိမ်ကနေ အလုပ်လုပ်တာ၊ မလိုအပ်ပဲ ခရီးမသွားတာ၊ ကာကွယ်ဆေးထိုးနှံမှုနှုန်းကို ထိန်းထားတာစတာတွေ ပါဝင်တယ်လို့ ဆိုပါတယ်။

တကယ်လို့သာ ဒီလိုကြိုတင်ကာကွယ်ထိန်းချုပ်မှုတွေ အပြည့်အဝလုပ်ဆောင်ထားနိုင် မယ်ဆိုရင်တော့ အခုလလယ်ပိုင်းထိ ကိုဗစ်-၁၉ နေ့စဉ်ကူးစက်မှုနှုန်းကို ၂ သောင်းလောက် မှာ ထိန်းထားနိုင်လိမ့်မယ်လို့ ဒီဒီစီက ပြောပါတယ်။

တဖက်မှာတော့ ရောဂါကြိုတင်ကာကွယ်ထိန်းချုပ်မှုတွေ ပြည့်ပြည့်ဝဝ မလုပ်ဆောင်နိုင်ခဲ့ဘူး ဆိုရင် လာမယ့် ထိုင်းရိုးရာ ဆုန်ကရန်သင်္ကြန်ပွဲတော်ကာလမတိုင်ခင် အခုမတ်လ လယ်လောက်မှာ တရက်ကို ၅ သောင်းလောက်ထိ ကူးစက်မှုနှုန်း မြင့်တက်လာနိုင်ပြီး တော့ နောက်လလယ်ပွဲတော်ကာလမှာတော့ တရက်ကို ကူးစက်မှုနှုန်း ၁ သိန်းထိ အဆိုး ဆုံးအခြေအနေထိလည်း ရောက်ရှိသွားနိုင်တယ်လို့ ဆိုပါတယ်။

ပြီးခဲ့တဲ့ ၂၄ နာရီအတွင်း ထိုင်းနိုင်ငံတဝန်းမှာတော့ ကိုဗစ်-၁၉ ရောဂါကူးစက်ခံရသူပေါင်း ၂၂,၃၁၁ ယောက်နဲ့ အယောက် ၄၀ ကျော် ထပ်မံသေဆုံးခဲ့ပြီး ဒါဟာ ပြီးခဲ့တဲ့ စနေနေ့က အ မြင့်ဆုံးစံချိန်တင်ကူးစက်မှု ၂၅,၆၁၅ ယောက်အောက် ၂ ရက်ဆက်တိုက် ကျဆင်းမှုဖြစ် လာခဲ့တာပါ။

ထိုင်းနိုင်ငံ ကိုဗစ်-၁၉ ရောဂါအခြေအနေ ထိန်းချုပ်ရေးစင်တာ ပြောရေးဆိုခွင့်ရှိသူ အဖီဆမိုင် ဆီရိရန်ဆန်ကတော့ ဒီကနေ့အထိ ကိုဗစ်-၁၉ ရောဂါကူးစက်ခံရသူပေါင်း ၂၁၃,၆၄၅ ယောက်ထဲမှာ ဆေးရုံတက်ရောက်ကုသမှု ခံယူနေသူ ၈၃,၄၇၉ ယောက်ရှိကာ အဲဒီထဲက ၉၈ ရာခိုင်နှုန်းဖြစ်တဲ့ ၈၂,၄၉၉ ယောက်ကတော့ မပြောပလောက်တဲ့ ရောဂါလက္ခဏာ သေးသေးမွှားမွှားတွေသာ ရှိခဲ့တယ်လို့ ပြောပါတယ်။

အဲဒီလို ရောဂါပြင်းပြင်းထန်ထန် မခံစားရသူတွေ၊ အနည်းငယ် ခံစားရသူတွေအနေနဲ့ နေ အိမ်တွေမှာသာ နေထိုင်နိုင်ပြီး ရောဂါအခြေအနေပိုပြီးဆိုးဝါးတဲ့ လူနာတွေကို ဦးစားပေး ကုသနိုင်ဖို့အတွက် သူတို့အနေနဲ့ မလိုအပ်ပဲ ဆေးရုံတက်ရောက်ဖို့မလိုဘူးလို့ ဆိုပါတယ်။