ထိုင်းနိုင်ငံရဲ့မြို့တော် ဘန်ကောက်က ရုရှားသံရုံးအရှေ့မှာ စစ်ဆန့်ကျင်ရေး ဆန္ဒပြပွဲကို ယူကရိန်း နိုင်ငံသားတွေနဲ့ နိုင်ငံခြားသားတွေ ဖေဖော်ဝါရီ ၂၈ ရက်က ဆင်နွှဲခဲ့ပါတယ်။

“ကျနော်တို့ ရုရှားကို ဖျက်ဆီးမယ်။ တကမ္ဘာလုံးအတွက် အန္တရာယ်ဖြစ်နေတဲ့ ပူတင်နဲ့ သူ့အစိုးရ ကျဆုံးလိမ့်မယ်” လို့ ထိုင်းနိုင်ငံကို လာရောက်လည်ပတ်ပြီး ရှေ့တန်းစစ်သည်တွေနဲ့ ပူးပေါင်းဖို့ ယူကရိန်းကို ပြန်မယ့် လူမှုရေးတက်ကြွလှုပ်ရှားသူ အန်ဒရူးရာဒက်စကီက ပြောပါတယ်။

သီရိလင်္ကာနိုင်ငံရဲ့ မြို့တော် ကိုလံဘိုမှာလည်း ဒါဇင်ချီတဲ့ ယူကရိန်း ဆန္ဒပြသူတွေက စစ်ဆန့်ကျင်ရေး ဆောင်ပုဒ်တွေကို ဟစ်ကြွေးရင်း ရုရှားကျူးကျော်စစ်ကို ဆန့်ကျင် ဆန္ဒပြခဲ့ပါတယ်။

ရုရှားသံရုံးရဲ့ လမ်းတဖက်ခြမ်းမှာ ရပ်ရင်း ဆန္ဒပြနေချိန်မှာ သီရိလင်္ကာရဲတွေက အနီးကပ် စောင့်ကြည့်ခဲ့ပါတယ်။

ဆန္ဒပြသူတွေဟာ နိုင်ငံတော်အလံတွေကို ကိုင်ဆောင်ရင်း စစ်ပွဲရပ်၊ ယူကရိန်းက နိုင်မယ် စတဲ့ စာသားတွေ ရေးထားတဲ့ လက်ကိုင်ဆိုင်းဘုတ်တွေကိုလည်း ကိုင်စွဲခဲ့ကြပါတယ်။

ရုရှားရဲ့ ကျူးကျော်စစ်ကို ဆန့်ကျင်ပြီး ကမ္ဘာတလွှား ရုရှားနိုင်ငံမှာပါ ပြည်သူတွေက ဆန္ဒပြခဲ့ကြတာပါ။

ရုရှားမှာတော့ ကြာသပတေးနေ့က စပြီး စစ်ဆန့်ကျင်ရေး ဆန္ဒပြပွဲတွေအတွင်း လူအယောက် ၆ ထောင်နီးပါးကို ဖမ်းဆီးပြီးပြီလို့ ဆန္ဒပြပွဲများ စောင့်ကြည့် လေ့လာရေးအဖွဲ့က ပြောခဲ့ပါတယ်။

ကျူးကျော်စစ်စအပြီး လေးရက်မပြည့်မီမှာ အနောက် နိုင်ငံတွေရဲ့ နိုင်ငံရေး၊ ဗျူဟာ၊ စီးပွားရေးနဲ့ ပူးပေါင်းတုံ့ပြန်မှုတွေက အတိုင်းအတာနဲ့ ပေါင်းစပ်ညှိနှိုင်းမှုမှာ မကြုံစဖူး ထူးခြားခဲ့တာပါ။

၃ ရက်ကြာ တိုက်ပွဲအပြီး ဆိုးရွားတဲ့ လူသားချင်းစာနာမှု နောက်ဆက်တွဲတွေ ဖြစ်လာခဲ့တယ်လို့ တနင်္လာနေ့မှာ ထုတ်ပြန်တဲ့ ကုလသမဂ္ဂအစီရင်ခံစာက ပြောပါတယ်။ ထိခိုက်သေဆုံးသူ အရေအတွက်က မြင့်လာနိုင်တယ်လို့လည်း ပြောပါတယ်။

ယူကရိန်းပြည်သူ ၅ သိန်းကျော်ဟာ အိမ်နီးချင်းနိုင်ငံတွေဆီ ထွက်ပြေးခဲ့တယ်လို့ ကုလသမဂ္ဂက ပြောထားပါတယ်။