မြောက်ကိုရီးယားနိုင်ငံဟာ အမေရိကန်နဲ့ မဟာမိတ်နိုင်ငံတွေရဲ့ စစ်ရေးလုပ်ရပ်တွေနဲ့ ပတ်သက်ပြီး အချိန်နဲ့တပြေးညီ သတင်းအချက်အလက်တွေရဖို့ လာမယ့်နှစ်တွေမှာ ကင်းထောက်ဂြိုဟ်တုတွေ လွှတ်တင်သွားမယ့်အကြောင်း မြောက်ကိုရီးယားခေါင်းဆောင် ကင်မ်ဂျုံအန်းက ပြောတယ်လို့ အစိုးရမီဒီယာက မတ်လ ၁၀ ရက်မှာ ဖော်ပြပါတယ်။

မနှစ်က ပထမဆုံး ကြေညာတဲ့ ငါးနှစ်စီမံကိန်းအတွင်း နေနဲ့ ချိန်သားကိုက်ထားတဲ့ ဝင်ရိုးစွန်း ပတ်လမ်းမှာ စစ်ဘက် ကင်းထောက်ဂြိုဟ်တုတွေ အများအပြား လွှတ်တင်ထားမယ်လို့ ကင်မ်က ပြောခဲ့တာပါ။

မြောက်ကိုရီးယား အမျိုးသားလေကြောင်း အာကာသဖွံ့ဖြိုးမှု စီမံခန့်ခွဲရေးရုံးကို လာရောက် စစ်ဆေးချိန်မှာ ပြောခဲ့တာလို့ KCNA သတင်းဌာနက ဖော်ပြထားပါတယ်။

“မြောက်ကိုရီးယားဟာ ကင်းထောက်ဂြိုဟ်တုတလုံး လွှတ်တင်ဖို့ ပြင်ဆင်နေတာ ဖြစ်နိုင်တယ်။ ဒီလုပ်ရပ်ဟာ နျူကလီးယားလက်နက်ပိုင်ရှင် မြောက်ကိုရီးယားအတွက် လက်နက်စမ်းသပ်ချက် ဆိုတဲ့ အငြင်းပွားစရာ ကိစ္စအတွက် သက်သေလည်း ဖြစ်နိုင်တယ်။ ဒီလို စမ်းသပ်ခြင်းအားဖြင့် တားမြစ်ခံ ပဲ့ထိန်းဒုံးကျည် နည်းပညာကို သူတို့ သုံးစွဲနိုင်တယ်” လို့ ပညာရှင်တွေက ပြောပါတယ်။

မြောက်ကိုရီးယားကတော့ ဖေဖော်ဝါရီ ၂၇ ရက်နဲ့ မတ်လ ၅ ရက်တွေမှာ ဂြိုဟ်တုစနစ်တွေကို ၂ ကြိမ် စမ်းသပ်ခဲ့တယ်လို့ ပြောပါတယ်။

တောင်ကိုရီးယား၊ ဂျပန်နဲ့ အမေရိကန်နိုင်ငံတွေက အာဏာပိုင်တွေကတော့ ဒီစမ်းသပ်ချက်တွေထဲမှာ ပဲ့ထိန်းဒုံးကျည် ပစ်လွှတ်စမ်းသပ်ချက်တွေလည်း ပါတယ်လို့ ပြောပါတယ်။