ဘရိုဗာရီမြို့ကိုကျူးကျော်လာသည့် ရုရှားတင့်ကားများကို ယူကရိန်းတပ်များ သိမ်းပိုက်
ကိယက်ဗ်မြို့တော်အနီး ဘရိုဗာရီမြို့မှာ ယူကရိန်းတပ်တွေက ရုရှားတင့်ကားတွေကို သိမ်းပိုက်နိုင်ခဲ့ပြီး ယာဉ်တန်းတခုကိုလည်း ဖျက်ဆီးနိုင်ခဲ့ပါတယ်။
ရုရှားတပ်တွေ ပစ်ထားခဲ့တဲ့ တင့်ကားတစ်စီးကို ပြုပြင်ပြီး ရန်သူလက်နက်ကို ကိုယ့်လက်နက်ဖြစ်အောင် အသုံးပြုသွားမယ်လို့ ယူကရိန်းစစ်သားက ပြောပါတယ်။
တခြားပျက်စီးနေတဲ့ သံချပ်ကာကားတစီးကိုလည်း သိမ်းပိုက်ထားပြီး ထွက်ပြေးသွားတဲ့ ရုရှား စစ်သားရဲ့ ကိုယ်ပိုင်နံပါတ်၊ တီရှပ်နဲ့ အိတ်တွေကို ပြသပါတယ်။
ယူကရိန်းစစ်တပ်က ရုရှားစစ်ယာဉ် ၃ စီးနဲ့ စစ်သား အယောက် ၃၀ ကို ချေမှုန်းနိုင်ခဲ့တာပါ။
ယူကရိန်းစစ်သားက “ကိယက်ဗ်မြို့ကို ဝင်လာတဲ့ ရုရှားစစ်ယာဉ်တန်းက အတော်များတယ်။ ကျနော်တို့ စစ်ကြောင်းထိပ်ပိုင်းကို ခြုံခိုတိုက်ခဲ့တာပါ။ ကြားထားတဲ့သတင်းက စစ်ကြောင်းထိပ် နံပါတ် ၆ တင့်ကားမှာ ရုရှားတပ်မှူးပါလာတယ်လို့ သိထားတယ်။ ကျနော်တို့ စစ်သားတွေ သေသေသပ်သပ် ခြုံခိုတိုက်နိုင်ခဲ့တယ်” လို့ ရိုက်တာသတင်းဌာနကို ပြောပါတယ်။
