တရုတ်သွင်းကုန်တွေအပေါ် သင့်တော်တဲ့ အကောက်ခွန် ကောက်ခံဖို့ ပျက်ကွက်လို့ ဥရောပသမဂ္ဂ EU ရဲ့ ရသုံးမှန်းခြေငွေစာရင်းမှာ ယူရိုငွေ ဘီလီယံအများအပြား ဆုံးရှုံးခဲ့ရတာနဲ့ပတ်သက်လို့ EU အမှုဆောင်တွေက တိုင်ကြားခဲ့လို့ EU ရဲ့ ထိပ်တန်းတရားရုံးက ဗြိတိန်ကို မတ်လ ၈ ရက်မှာ စီရင်ချက် ချမှတ်လိုက်ပါတယ်။

၂၀၁၁ ကနေ ၂၀၁၇ ကြားမှာ EU ဟာ ဘဏ္ဍာငွေ ၂ ဒသမ ၇ ဘီလီယံ ယူရို ဆုံးရှုံးခဲ့ရတယ်လို့ ဗြိတိန်အပေါ် တရားစွဲတဲ့ ဥရောပကော်မရှင်က ပြောပါတယ်။

ဗြိတိန်နိုင်ငံထဲကို ကုန်စည်တင်သွင်းသူတွေဟာ တရုတ် အထည်အလိပ်တွေနဲ့ ဖိနပ်တွေအတွက် တန်ဖိုးကို တမင်လျှော့ကြေညာပြီး ငွေတောင်းခံလွှာအတုတွေနဲ့ အကောက်ခွန် အမြောက်အမြားကို အခွန်ရှောင်ခဲ့ကြတယ်လို့လည်း ဥရောပကော်မရှင်က တိုင်တန်းခဲ့ပါတယ်။