စီးပွားရေးအကျပ်အတည်း ရင်ဆိုင်နေရတဲ့ သီရိလင်္ကာနိုင်ငံအနေနဲ့ အခုနှစ် ဘတ်ဂျက်လိုငွေ ၁၄ ရာခိုင်နှုန်း လျှော့ချဖို့ နိုင်ငံတကာ ငွေကြေးရန်ပုံငွေအဖွဲ့ (IMF) ရဲ့ အကူအညီယူပြီး စတင်ဖြေရှင်းနေပြီလို့ သမ္မတ ဂိုတာဘယာ ရာဂျာပါခ်ဆာက ပြောပါတယ်။

သီရိလင်္ကာဟာ ပြီးခဲ့တဲ့ ၂ နှစ်အတွင်း နိုင်ငံခြားငွေလဲလှယ်မှု အရန်ငွေ ၇၀ ရာခိုင်နှုန်း၊ ဒေါ်လာ ၂ ဒသမ ၃၁ ဘီလီယံ ကျဆင်းသွားခဲ့တာပါ။

“ကျနော်တို့ အခု အခြေခံကုန်ပစ္စည်း ရှားပါးမှု၊ ကုန်ဈေးနှုန်းမြင့်မားမှု၊ လောင်စာဆီ ပြတ်လပ်မှု၊ လျှပ်စစ်မီး မရရှိမှုတွေကို အဖြေရှာနေပါတယ်။ အားသာချက် အားနည်းချက်တွေကို ဆန်းစစ်ပြီးနောက် IMF နဲ့ စတင်လုပ်ဆောင်ပါတော့မယ်” လို့ သမ္မတက ပြောပါတယ်။

သီရိလင်္ကာဟာ တရုတ်နဲ့ အိန္ဒိယတို့ဆီကလည်း ချေးငွေပုံစံ (credit lines)၊ ငွေကြေးလဲလှယ်မှုပုံစံ (currency swaps) တွေနဲ့ ဘဏ္ဍာရေး အကူအညီတွေ ရယူထားတာပါ။

ပြီးခဲ့တဲ့နှစ် ကုန်သွယ်မှုလိုငွေ ဒေါ်လာ ၈ ဒသမ ၁ ဘီလီယံကနေ အခုနှစ် ဒေါ်လာ ၇ ဘီလီယံထိ လျှော့ချမယ်လို့လည်း သမ္မတက ပြောပါတယ်။

ပြည်ပမှာ အလုပ်အကိုင် သွားလုပ်ကြသူတွေရဲ့ ငွေကြေးပြန်လွှဲပို့မှု ဒေါ်လာ ၅ ဘီလီယံအထိ ရဖို့လည်း သမ္မတက မျှော်လင့်ထားတယ်လို့ ပြောပါတယ်။