နာမည်ကြီး ရုပ်ရှင် ဒါရိုက်တာ မောင်မျိုးမင်း(ရင်တွင်းဖြစ်) ဦးဆောင်သင်ကြားမယ့်   သရုပ်ဆောင်၊ ဒါရိုက်တာ၊ ဇာတ်လမ်း၊ ဇာတ်ညွှန်းသင်တန်းတွေ ဖွင့်လှစ်သွားမယ်လို့ ကြေညာထားပါတယ်။

ဒါရိုက်တာ မောင်မျိုးမင်း ဦးဆောင်သင်ကြားနေတဲ့ ရန်ကုန်မြို့အခြေစိုက် 3H Art Academy ကနေ သင်ကြားပေးသွားမှာဖြစ်ပြီး သင်တန်းကာလ ၃ လသတ်မှတ်ထားကာ တလကို ဘာသာရပ်တခုအတွက် သင်တန်း ကြေး ကျပ်  ၃ သိန်းသတ်မှတ်ထားပြီး မီးပျက်ပါက မီးစက်နဲ့ သင်ကြားပေးမယ်လို့ ဆိုပါတယ်။

လက်ရှိကာလ မြန်မာနိုင်ငံမှာ အကြမ်းဖက်စစ်ကောင်စီက အာဏာသိမ်းထားတဲ့ ၁ နှစ်ကျော် ကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေးစတဲ့ ကဏ္ဍတွေအသီးသီးမှာ အဘက်ဘက်က ကျဆင်းနေခဲ့တာပါ။

စစ်အာဏာရှင်စနစ်ကို ဆန့်ကျင်ဆန္ဒပြခဲ့ကြပြီး ပြည်သူတွေနဲ့ တသားတည်း ရပ်တည်နေတဲ့ အနုပညာရှင်တွေ၊ ထင်ရှားကျော်ကြားသူတွေကို  စစ်ကောင်စီက ဖမ်းဆီးထောင်ချတာတွေကို လုပ်ဆောင်နေသလို တဖက်မှာလည်း ရန်ကုန်နဲ့ မန္တလေးက ရုပ်ရှင်ရုံတွေကို ပြန်လည်ဖွင့်လှစ်ပြသဖို့ ရုပ်ရှင်ထုတ်လုပ်ရေး လုပ်ငန်းတွေကို ဖိအားပေးစေခိုင်းနေတာကို တွေ့ရပါတယ်။

ကိုဗစ်ကာလကတည်းက ပိတ်ထားခဲ့ရတဲ့ ရုပ်ရှင်ရုံတွေဟာ စစ်အာဏာသိမ်းပြီးနောက်မှာလည်း ပြန်လည်မဖွင့်လှစ်နိုင်ခဲ့ဘဲ ပိတ်ထားခဲ့တာ ၂ နှစ်နီးပါး ကြာမြင့်နေခဲ့ပြီဖြစ်ပါတယ်။

စစ်အာဏာရှင်စနစ်ကိုဆန့်ကျင် တော်လှန်နေကြတဲ့ ပြည်သူတွေကလည်း  စစ်ကောင်စီလက်အောက်မှာ အနုပညာလှုပ်ရှားမှုတွေ လုပ်ဆောင်နေကြတဲ့ အနုပညာရှင်တွေကို လူမှုပြစ်ဒဏ်ခတ်သပိတ်မှောက်တာ တွေကို ကျယ်ကျယ်ပြန့်ပြန့် လုပ်ဆောင်နေကြပါတယ်။