ဖေဖော်ဝါရီ ၂၄ ရက် ရုရှားကျူးကျော်စစ် စတင်ကတည်းက ကြီးမားတဲ့ဗုံးတွေ အဆက်မပြတ် အကြဲခံနေရတဲ့ ယူကရိန်းနိုင်ငံ မာရီယူပိုးလ်မြို့မှာ လူ ၄ သိန်းကျော်ဟာ စားစရာနဲ့ သောက်သုံးရေမရှိ၊ လျှပ်စစ်မီးပြတ်ပြီး မြို့ထဲမှာ ပိတ်မိနေပါတယ်။ 

ဆိုးရွားတဲ့စစ်ဘေးကြောင့် စိတ်ဖိအားဝင်နေတဲ့ သူတချို့ဟာ ကျန်းမာရေးကုသမှု မရရှိဘဲ ကွယ်လွန်ခဲ့ပါတယ်။ 

အိမ်နီးချင်းတွေရဲ့ အလောင်းတွေကို မြေတူးမြှုပ်ပေးနေတဲ့ ဒေသခံ အန်ဒရေ ဆိုသူက “အခုမှာ အစရှိပါသေးတယ်၊ နောက်ဆို အများကြီး မြေမြှုပ်ရတော့မှာ” လို့ ပြောပါတယ်။

မာရီယူပိုးလ်မြို့ရဲ့ အစိတ်အပိုင်းအများစုကို ရုရှားတပ်တွေ ထိန်းချုပ်ထားလိုက်ပြီး အစိတ်အပိုင်းအချို့က ယူကရိန်းအောက်မှာ ဆက်ရှိနေပါသေးတယ်။ မြို့မှာ ကျန်ရှိနေသူတွေက သူတို့ကံကြမ္မာ ဘာဖြစ်မယ်မသိဘဲ စိုးရိမ်ပူပန်နေရပါတယ်။ 

ကုလသမဂ္ဂလူ့အခွင့်အရေးရုံး OHCHR က မတ်လ ၁၉ ရက်နေ့အထိ ယူကရိန်းမှာ အရပ်သား ၉၀၂ ဦး သေဆုံးပြီး ၁၄၅၉ ဦး ဒဏ်ရာရခဲ့တယ်လို့ ဖော်ပြပါတယ်။ 

မာရီယူပိုးလ်အပါအဝင် မြို့ကြီး အတော်များများ ဗုံးကြဲခံနေရတာကြောင့် သေဆုံးစာရင်း အတိအကျ မယူနိုင်သေးဘူးလို့လည်း ဖော်ပြပါတယ်။