ရှန်ဟိုင်းတွင် ကိုဗစ်-၁၉ ကူးစက်မှု ၅ ရက်ဆက်တိုက် စံချိန်တင်မြင့်တက်
တရုတ်နိုင်ငံရဲ့ ဘဏ္ဍာရေးမြို့တော် ရှန်ဟိုင်းမှာ ရောဂါလက္ခဏာပြတဲ့ ကိုဗစ်-၁၉ ကပ်ရောဂါ ကူးစက်ခံဦးရေဟာ ငါးရက်ဆက်တိုက် စံချိန်တင် မြင့်တက်ခဲ့တယ်လို့ မတ် ၂၂ ရက်က အစီရင်ခံထားပါတယ်။
ကူးစက်နှုန်းမြင့်တဲ့ အိုမီခရွန် ဗီဇမျိုးကွဲကြောင့် ဗိုင်းရပ်စ်ကူးစက်မှု ရပ်တန့်ရေး အားထုတ်မှုတွေ ရှုပ်ထွေးခဲ့တာပါ။
မတ် ၂၁ ရက်က ရှန်ဟိုင်းမှာ တရက်အတွင်း ရောဂါလက္ခဏာပြတဲ့ ဒေသတွင်း ကူးစက်ခံဦးရေ ၈၆၅ ယောက်ရှိပြီး အရင်နေ့က ၇၃၄ ယောက် ရှိတယ်လို့ ဆိုပါတယ်။
ရှန်ဟိုင်းကူးစက်မှု အပါအဝင် တရုတ်ပြည်မကြီးမှာ မတ် ၂၁ ရက်နေ့ တရက်တည်း ပြည်တွင်းကူးစက်ခံ စုစုပေါင်း ၂,၂၈၁ ယောက်ရှိတယ်လို့ အမျိုးသား ကျန်းမာရေးကော်မရှင်က ပြောပါတယ်။
အသစ်ကူးစက်ခံ အများစုကို တရုတ်နိုင်ငံ အရှေ့မြောက်ပိုင်း ကျိလင်းပြည်နယ်မှာ တွေ့ခဲ့တာဖြစ်ပြီး ပိုးမသတ်ရသေးတဲ့ လမ်းတွေပေါ်က လုပ်သားတွေရဲ့ ရုပ်ပုံကို တရုတ်အစိုးရမီဒီယာ စီစီတီဗွီက ထုတ်လွှင့်ပြသခဲ့ပါတယ်။
တရုတ်မြို့တော် ပေကျင်းက စမ်းသပ်ဌာန ရှေ့မှာတော့ ရောဂါကူးစက်မှုရှိမရှိ စမ်းသပ်ခံဖို့ ဒေသခံတွေ တန်းစီ စောင့်ဆိုင်းနေပါတယ်။
