မန္တလေးတိုင်း၊ မတ္တရာမြို့နယ် အရှေ့ပိုင်းနယ်ကို နယ်မြေရှင်း‌လင်းရေး ရောက်ရှိလာတဲ့ ယာဉ်ငါးစီးပါ စစ်ကောင်စီ ယာဉ်တန်းကို မိုင်းဆွဲတိုက်ခိုက်ခဲ့တယ်လို့ ပကဖ(မတ္တရာ) က ပြောပါတယ်။

မတ်လ ၂၇ ရက်နေ့၊ မနက် ၁၁ နာရီ ၄၀ မိနစ်မှာ မတ္တရာအရှေ့ပိုင်းနယ်ကို နယ်မြေရှင်းလင်းရေး ရောက်ရှိလာတဲ့ ယာဥ်တန်းအား သဖန်းကိုင်းအုပ်စု သဖန်းကိုင်းကျေးရွာ နဲ့ မြောင်းသစ်ကျေးရွာအကြားမှာ ပကဖ(မတ္တရာ) အဖွဲ့က မိုင်းဆွဲတိုက်ခိုက်ခဲ့တာကြောင့် ကားကြီးနှစ်စီး တိုက်ရိုက်ထိမှန်ပြီး အထိအခိုက်အကျအဆုံး များနိုင်တယ်လို့ ဆိုပါတယ်။

ပကဖ(မတ္တရာ)ရဲ့ တာဝန်ရှိသူတဦးက “ကားကတော့ ငါးစီးကို ဆွဲတာပေါ့၊ အကြီးကြီးနှစ်စီးကတော့ ကွင်းထဲမှာ တည့်ဝင်တာဆိုတော့ သူတို့နှစ်စီးကို ထိထိမိမိ မိတယ်။ အဲ့နားမှာတော့ ပစ်ခတ်မှုတွေဖြစ်တယ်၊ သဖန်းကိုင်းရွာထဲကိုလည်း ပစ်ခတ်ပြီးတော့ ဝင်သွားတယ်” လို့ ပြောပါတယ်။

စစ်ကောင်စီတပ်တချို့ဟာ လတ်တလောအချိန်အထိ သဖန်းကိုင်းကျေးရွာအတွင်း တပ်စွဲထားတယ်လို့ သိရပါတယ်။