ယူကရိန်းမှာ ရုရှားစစ်တပ်ရဲ့ ရက်စက်ယုတ်မာမှုတွေ ပိုများလာတဲ့နောက် ရုရှားနဲ့ စေ့စပ်ဆွေးနွေးရေးလုပ်ဖို့ ပိုခက်သွားပြီလို့ ယူကရိန်းသမ္မတ ဇလန်းစကီးက ပြောပါတယ်။

မကြာခင်က ရုရှားတပ်တွေလက်မှ ပြန်လည်သိမ်းပိုက်ရရှိတဲ့ ဘူချာမြို့မှာ ကြိုးတုပ်ထားတဲ့  အရပ်သားတွေရဲ့ အလောင်းတွေ၊ အစုပြုံလိုက် မြှုပ်နှံထားတာတွေ၊ တန်းစီပစ်သတ်ခဲ့တာတွေကို တွေ့ရှိရပြီးနောက် ဇလန်းစကီးက နိုင်ငံပိုင်ရုပ်သံကနေ ပြောခဲ့တာပါ။

“ဒါ စစ်ရာဇဝတ်မှုတွေပါ၊ လူမျိုးတုံးသတ်ဖြတ်မှုတွေလို့ ကမ္ဘာက အသိအမှတ်ပြုရမယ့်ဟာပါ။ အခု သူတို့ လုပ်ခဲ့တာတွေ မြင်ရတော့ ဆွေးနွေးဖို့ ပိုခက်သွားပါပြီ၊ သူတို့ ဆွေးနွေးပွဲကို အချိန်ပိုဆွဲခဲ့တာကြောင့် ဒီလိုတွေ ဖြစ်လာတာပါ၊ အခုတော့ ပိုခက်သွားပါပြီ။ လူတွေ ထောင်ချီပြီး သတ်ခဲ့တယ်၊ နှိပ်စက်တယ်၊ ခြေလက်ဖြတ်တယ်၊ အဓမ္မပြုကျင့်တယ်၊ ကလေးတွေကို သတ်သွားတယ်။” 

ရုရှားကတော့ ဘူချာမှာ သတ်ဖြတ်မှုတွေကို ငြင်းဆန်ပါတယ်။