ထိုင်းနိုင်ငံမှာ ဧပြီလဆန်းက စပြီး ပြည်ဝင်ခွင့်စည်းမျဉ်းတွေ ဖြေလျော့ပေးလိုက်ကတည်းက နိုင်ငံခြားခရီးသည် အရေအတွက် သိသိသာသာ တိုးလာခဲ့ပါတယ်။

ထိုင်းနိုင်ငံရဲ့ အကြီးဆုံးလေဆိပ်ဖြစ်တဲ့ သုဝဏ္ဏဘူမိလေဆိပ်မှာ ကိုဗစ်-၁၉ ကပ်ဘေးမဖြစ်ခင်က နှစ်စဉ် တနှစ်ကို ခရီးသည် အယောက် သန်း ၆၀ ကျော် ရောက်လာခဲ့တာပါ။

ကိုဗစ်ကူးစက်မှု ထိန်းချုပ်ရေး တင်းကျပ်တဲ့ ကန့်သတ်ချက်တွေအောက်မှာ ခက်ခဲတဲ့ကာလကို ကျော်လွန်အပြီး အရင်အပတ်ကစလို့ ခရီးသည်တွေ သိသိသာသာ တိုးလာခဲ့ပါတယ်။ ခုတော့ နေ့တိုင်း နိုင်ငံခြားသား ခရီးသည် အယောက် ၁ သောင်းကျော် ရောက်လာနေပြီလို့ လေဆိပ်လုံခြုံရေးတယောက်က ပြောပါတယ်။

ဧပြီ ၁ ရက်ကစလို့ ထိုင်းနိုင်ငံကို ရောက်လာတဲ့ နိုင်ငံခြား ခရီးသည်တွေဟာ သူတို့ မထွက်လာခင် ၇၂ နာရီအတွင်း ကိုဗစ်ကူးစက်ခံမဟုတ်ကြောင်း ဆေးစစ်ချက် ရလဒ်ကို ပြဖို့ မလိုတော့ပါဘူး။ ဒါပေမယ့် လေဆိပ်ကို ရောက်ရောက်ချင်း RT-PCT အမျိုးအစား ဆေးစစ်မှုကို ခံယူဖို့ လိုပါတယ်။

နိုင်ငံတလွှား နေ့စဉ် အသစ်ကူးစက်ခံ အရေအတွက် မြင့်နေဆဲဖြစ်လို့ ခရီးသွားလုပ်ငန်းကဏ္ဍက နယ်စပ်တွေကို အပြည့်အဝ ပြန်ဖွင့်ပေးဖို့ တောင်းဆိုနေပေမယ့် အစိုးရက ကန့်သတ်ချက်ကို ဖြည်းဖြည်းချင်းပဲ ပြန်ဖြေလျော့ပေးဖို့ ဆုံးဖြတ်ထားပါတယ်။

သင်္ကြန်အားလပ်ရက်မှာ ကိုရိုနာဗိုင်းရပ်စ် ကူးစက်နှုန်း မြင့်မယ့်ဘေးကို ဦးတည်နေလို့ ကာကွယ်ဆေးထိုးနှုန်း နည်းတဲ့ အသက် ငါးနှစ်အောက်နဲ့ သက်ကြီးအုပ်စုတွေအတွက် ပြည်သူ့ကျန်းမာရေး ဝန်ကြီးဌာနက စိုးရိမ်နေတာပါ။

ကပ်ဘေး ကာကွယ်ထိန်းချုပ်ရေး လုပ်ဆောင်ချက်တွေကို တင်းတင်းကျပ်ကျပ် လိုက်နာကြဖို့ ပြည်သူတွေကို တိုက်တွန်းထားပါတယ်။