လက်တင်အမေရိကနိုင်ငံတွေဖြစ်တဲ့ မက္ကဆီကိုနဲ့ ပီရူးနိုင်ငံတွေမှာ အာဏာပိုင်တွေဟာ လတ်တလောရက်တွေအတွင်း မူးယစ်ဆေးဝါးတွေ အလေးချိန်တန်ချီ သိမ်းဆည်းရမိခဲ့ပါတယ်။

ပီရူးအာဏာပိုင်တွေဟာ မြို့တော်လီမာရှိ အိမ်တလုံးထဲကနေ ဆေးခြောက် ၁ ဒသမ ၅ တန်နဲ့ မူးယစ်မှောင်ခိုဂိုဏ်းအဖွဲ့ဝင် ၃ ယောက်ကို ဖမ်းဆီးခဲ့တယ်လို့ ဧပြီ ၂၀ ရက်မှာ ကြေညာပါတယ်။

ကိုလံဘီယာနိုင်ငံက ဆေးခြောက်တွေဟာ အီကွေဒေါနိုင်ငံကို ဖြတ်ပြီး ပီရူးကို ရောက်လာတာလို့ ပြည်ထဲရေးဝန်ကြီး အယ်လ်ဖွန်ဆို ချာဗာရီက ပြောပါတယ်။

ပီရူးရဲတပ်ဖွဲ့ဟာ ၂၀၂၂ ခုနှစ်အတွင်း စစ်ဆင်ရေး ၄,၄၂၁ ခုလုပ်ခဲ့ရာ ရာဇဝတ်ဂိုဏ်း ၂၅ ခုကို ဖြိုခွဲနိုင်ခဲ့သလို လူ ၉၅၉ ယောက်ကို ဖမ်းခဲ့ပြီး မူးယစ်ဆေး ၁၆ ဒသမ ၉ တန် သိမ်းဆည်းခဲ့တယ်လို့ အာဏာပိုင်တွေက ပြောပါတယ်။

မက္ကဆီကို ရေတပ်ကလည်း မန်ဇာနီလို ကမ်းရိုးတန်း ကမ်းလွန်ပင်လယ်ပြင်မှာ ဧပြီ ၁၄ ရက်က ကိုကင်း ၁ ဒသမ ၇ တန် သိမ်းဆည်းရမိခဲ့ပါတယ်။

ကိုလီမာပြည်နယ် မန်ဇာနီလိုကမ်းရိုးတန်း အရှေ့တောင်ဘက်က ရေမိုင် ၂၇၀ အကွာ ပင်လယ်ထဲမှာ လိုက်ဖမ်းခဲ့တဲ့ လုံခြုံရေးကင်မရာက ရိုက်ကူးထားတဲ့ ရုပ်သံကိုလည်း ဖြန့်ချိလိုက်ပါတယ်။

မက္ကဆီကို အရာရှိတွေဟာ ရေတပ်ရဟတ်ယာဉ်နဲ့ ပျံသန်း ကင်းလှည့်နေတုန်း စပိဘုတ်တစီးပေါ်က လူ ၄ ယောက်က မူးယစ်ဆေးအထုပ်တွေကို ပင်လယ်ထဲ ပစ်ချနေတာကို ထောက်လှမ်း တွေ့ရှိခဲ့တာပါ။

သံသယရှိသူ လေးယောက်ကို ဖမ်းဆီးခေါ်ဆောင်လာခဲ့ပြီး ခုတော့ သူတို့ဟာ မူးယစ်မှောင်ခိုမှုနဲ့ ပတ်သက်တဲ့ စွဲချက်တွေကို ရင်ဆိုင်နေရပါတယ်။