ကြာအင်းဆိပ်ကြီးတိုက်ပွဲတွင် စစ်တပ်က လက်နက်ကြီးပစ်ခတ်သဖြင့် ဒေသခံ ၁ ဦးသေ၊ ၂ ဦး ဒဏ်ရာရ
ကေအန်ယူ- ကရင်အမျိုးသားအစည်းအရုံး၊ တပ်မဟာ ၆ နယ်မြေ၊ ဒူးပလာယာခရိုင်၊ ကြာအင်းဆိပ်ကြီး(ဝင်းရော်)မြို့နယ်၊ ခလယ်တံခွန်တိုင်ရဲစခန်းအနီး ဧပြီ ၂၃ ရက် နေ့လယ် ၁ နာရီလောက်က စစ်ကောင်စီတပ်တွေနဲ့ KNLA ပူးပေါင်းတပ်တို့ တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။
အဆိုပါတိုက်ပွဲအတွင်း စစ်ကောင်စီရဲ့ အရှေ့တောင်တိုင်းစစ်ဌာနချုပ် လက်အောက်ခံ တပ်ရင်း၊ တပ်ဖွဲ့ဝင်အင်အား ၆၀ လောက်က ရဲပူးပေါင်းတပ်ဖွဲ့ဝင်တွေနဲ့ ရဲစခန်းအတွင်းကနေ လက်နက်ကြီး လက်နက်ငယ်တွေနဲ့ ကျေးရွာအတွင်းကိုပါ ပစ်ခတ်ခဲ့တဲ့အတွက် ဒေသခံ ၁ ဦးသေဆုံးပြီး ၂ ဦး ထိမှန်ဒဏ်ရာရရှိခဲ့ပါတယ်။
ရဲစခန်းအတွင်းကနေ လက်နက်ကြီး အချက် ၂၀ ကျော်နဲ့ လက်နက်ငယ်တွေပါ ပစ်ခတ်နေတဲ့အတွက် နေအိမ်တွေပါ ထိမှန်ပျက်စီးခဲ့တဲ့အပြင် ဒေသခံတွေဟာ ဘေးလွတ်ရာထွက်ပြေးတိမ်းရှောင် နေကြရပါတယ်။
ခလယ်တံခွန်တိုင်ကျေးရွာသားတဦးက “လက်နက်ကြီး ပစ်လို့ လင်မယား ၂ ယောက်ထိသွားတယ်။ မိန်းမတော့ သေသွားပြီ။ ယောကျ်ားက ဒဏ်ရာရတယ်။ ကျန် အမျိုးသား ၁ ယောက်ပါထိတယ်။ ရဲစခန်းထဲကို စကစက ရောက်နေတာကြာပြီ။ အခု ဒေသခံတွေကို ကြောက်လန့်အောင်လုပ်နေတယ်” လို့ ပြောပါတယ်။
ဒါအပြင် ရဲစခန်းရှေ့ကနေ ဖြတ်သန်းသွားလာနေတဲ့ ဆိုင်ကယ်တွေကိုပါ လက်နက်ငယ်တွေနဲ့ ပစ်ခတ်ခဲ့သလို ဧပြီ ၂၂ ရက် ညပိုင်းကလည်း ကျေးရွာအတွင်းကို လက်နက်ကြီး ၁ ချက်နဲ့ လက်နက်ငယ်တွေ ပစ်ခတ်ခဲ့တယ်လို့ ဆိုပါတယ်။
မတ် ၃၁ ရက်က ကြာအင်းဆိပ်ကြီးမြို့နယ်၊ လွတ်ရှမ်းကျေးရွာမှာ အခြေချနေတဲ့ ခမရ ၂၀၇ တပ်စခန်း(လွှတ်ရှမ်း)က ဗိုလ်မှူး ဟန်မင်းက ညနေ ၄ နာရီနောက်ပိုင်း တပ်စခန်းရှေ့ကနေ ဖြတ်သန်းသွားလာသူတွေကို ပစ်သတ်မယ်လို့ ခြိမ်းခြောက်ပြောဆိုခဲ့ပါတယ်။
ပြီးခဲ့တဲ့ ဧပြီ ၂၁ ရက် ညနေ ၅ နာရီလောက်က ဒူးပလာယာခရိုင်၊ နို့တကောမြို့နယ်၊ ကွီးလယ်တဲနဲ့ ကွီးလယ်ရွာသစ်ကျေးရွာတွေကို စစ်ကောင်စီက လေကြောင်းကနေ တိုက်ခိုက်ရေး ရဟတ်ယာဉ် ၂ စီး နဲ့ ဗုံး ၅ လုံး ပစ်ခတ်တိုက်ခိုက်ခဲ့သလို ထီးသဘျူးခီးကျေးရွာကိုပါ ဗုံး ၃ လုံး ထပ်မံပစ်ခတ်တိုက်ခိုက်ခဲ့ပါတယ်။
ကေအန်ယူ၊ တပ်မဟာ ေ၊ ဒူးပလာယာခရိုင်အတွင်း စစ်ကောင်စီတပ်တွေနဲ့ KNLA ပူးပေါင်းတပ်တွေ နေ့စဉ်တိုက်ပွဲတွေဖြစ်ပွားနေသလို ကျေးရွာအတွင်း လက်နက်ကြီးနဲ့ပစ်ခတ်တာတွေကြောင့် လူ နဲ့ တိရစ္ဆာန်တွေ ထိမှန်သေဆုံးတာ၊ ဒဏ်ရာရရှိတာတွေအပြင် နေအိမ်တွေ ထိမှန်ပျက်ဆီးခဲ့ပါတယ်။
နှစ်ဖက်တိုက်ပွဲတွေကြောင့် ဒေသခံတွေဟာ ဘေးလွတ်ရာထွက်ပြေးတိမ်းရှောင်နေရတဲ့အပြင် ဒေသခံတွေရဲ့ ပစ္စည်းတွေ၊ စားသောက်စရာတွေ၊ တိရိစ္ဆာန်တွေကို အတင်းအဓမ္မယူဆောင်တာတွေနဲ့ လူအခွင့်အရေးချိုးဖောက်တာတွေရှိတယ်လို့ ဒေသခံပြည်သူတွေက ဆိုပါတယ်။
