တမူးမြို့နယ်တိုက်ပွဲတွင် စစ်ကောင်စီတပ်သား ၁၅ ဦးထက်မနည်းသေဆုံး
စစ်ကိုင်းတိုင်း တမူးမြို့နယ်မှာ ဧပြီ ၂၃ ရက်နေ့ နေ့လယ်ပိုင်းက တမူး - အောင်ဇေယျကားလမ်းပေါ် တပ်အချိန်းအပြောင်းပြုလုပ်နေတဲ့ စစ်ကောင်စီတပ်ဖွဲ့ယာဉ်တန်းအား တမူးပြည်သူ့ကာကွယ်ရေး တပ်ဖွဲ့တပ်ရင်း - ၁ နဲ့ ၂ ပူးပေါင်းတပ်က ကြားဖြတ်ချုံခိုတိုက်ခိုက်ခဲ့ကြတယ်လို့ သိရပါတယ်။
တိုက်ပွဲဖြစ်စဉ်အတွင်း နှစ်ဖက်အပြန်အလှန် ပစ်ခတ်တိုက်ခိုက်ခဲ့ကြပြီး ထိတွေ့တိုက်ပွဲ နှစ်ကြိမ် ဖြစ်ပွားခဲ့ကာ စစ်ကောင်စီတပ်ဖွဲ့ဝင် ၁၅ ဦးထက်မနည်းကျဆုံးခဲ့ပြီး ပြည်သူ့ကာကွယ်ရေးတပ်ဖွဲ့ဝင်တွေတော့ ထိခိုက်ကျဆုံးမှုမရှိဘဲ ဆုတ်ခွာနိုင်ခဲ့တယ်လို့ တမူး PDF ရဲ့ ပြန့်ကြားရေးတာဝန်ခံက ဒီဗွီဘီကို ပြောပါတယ်။
"သူတို့က ခလရ ၂၆၆ က တပ်သားတွေနဲ့ ခလရ ၈၉ တပ်သားတွေ တပ်ချိန်းတယ်လို့ သတင်းရလို့ ကျနော်တို့က ကြားဖြတ်တိုက်တာ စစ်ကောင်စီဘက်က အတုံးအရုံးကျဆုံးကြတာ တိုက်ပွဲပြီး ညနေပိုင်းမှာ လူနာတင်ကား ၄ စီး နဲ့ ကလေးဆေးရုံဘက်ကို တင်ဆောင်သွားကြတယ်။”
တမူးပြည်သူ့ကာကွယ်ရေးတပ်ဖွဲ့တွေအနေနဲ့ တမူး - အောင်ဇေယျ ကားလမ်းပိုင်းအား နယ်မြေရှင်းလင်းရေးနဲ့ ယာဉ်စစ်ဆေးရေးလုပ်ငန်းတွေကို ဆက်လက်ဆောင်ရွက်သွားမှာဖြစ်ပြီး စစ်အာရှင်စနစ် အပြီးတိုင်ချူပ်ငြိမ်းရေးအတွက် ဆက်လက်တိုက်ပွဲဝင်သွားမယ်လို့ ဆိုပါတယ်။
ချုံခိုတိုက်ခိုက်ခံရတာကြောင့် စစ်ကောင်စီတပ်ဖွဲ့ဝင်တွေ ကျဆုံးဒဏ်ရာရတာနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။
