ထိုင်းနိုင်ငံ တာ့ခ်ရိုင် ထာ့ဆောင်ယန်းမြို့နယ်ထဲမှာ ပြီးခဲ့တဲ့ရက်ပိုင်းက ဆင်မ ၁ ကောင် တောထဲမှာ အစာရှာစားရင်း ဓာတုဆေးအဆိပ်မိကာ သေဆုံးသွားခဲ့ပြီး အတူပါသွားတဲ့ နို့စို့ရွယ် ဆင်ကလေးက မိခင်နားက တဖဝါးမခွါဘဲ တွယ်ကပ်နေတယ်လို့ ထိုင်းရတ်သတင်းက ဖော်ပြပါတယ်။ 

ပြီးခဲ့တဲ့ ဧပြီ ၂၃ ရက်နေ့က ထာ့ဆောင်ယန်းမြို့နယ် မယ်လကျေးရွာအုပ်စုရှိ ယာခင်းတခုအနီးမှာ ဆင်တကောင် သေဆုံးနေပြီး အနီးမှာ နို့စို့ရွယ် ဆင်ကလေးတကောင် ရှိနေကြောင်း ရွာသားတွေက သတင်းပို့တဲ့အတွက် သက်ဆိုင်ရာက သွားရောက်စစ်ဆေးသယ်ဆောင်ခဲ့ပါတယ်။ 

အဆိုပါဆင်သားအမိဟာ ချင်းမိုင်ခရိုင် အုမ်းကွယ်မြို့နယ်ကဖြစ်ပြီး ယခင်ကတော့ ဆင်စခန်း တခုက ကမ္ဘာလှည့်ခရီးသည်ကြည့်ရှုဇုန်မှာရှိပြီး ထိုင်းမှာ ကိုဗစ်-၁၉ ကပ်ရောဂါကြောင့် ဧည့်သည်တွေ မလာလို့ ပိုင်ရှင်ရော ဆင်ပါ အလုပ်လက်မဲ့ဖြစ်နေရကြောင်း၊ ဒါကြောင့် ဆင်တွေကို တောထဲမှာ သူတို့ဘာသာသူတို့ ရှာဖွေစားသောက်ဖို့ လွှတ်ထားရာမှာ အဆိုပါဆင်သားအမိနဲ့ နောက်ထပ်ဆင်တကောင်ပါ တာ့ခ်ခရိုင်ဘက် နယ်ကျွံသွားပြီး စိုက်ခင်းအနီးနားက ရွာသားတွေ စွန့်ပစ်ထားတဲ့ ဓာတ်မြေဩဇာ ဒါမှမဟုတ် ပိုးသတ်ဆေးတွေ စားမိဟန်တူတယ်လို့ ချင်းမိုင်ခရိုင် ဆင်နဲ့သဘာဝ ဖောင်ဒေးရှင်းအဖွဲ့က ပြောပါတယ်။ 

ဆင်ကလေးမှာလည်း နေမကောင်းပုံပေါ်ပြီး နောက်ဆင်တကောင်ကတော့ ဝမ်းလျှောနေလို့ သူတို့လည်း အဆိုပါမြေဩဇာ သို့မဟုတ် ပိုးသတ်ဆေး စားမိဟန်တူကြောင်း၊ တာဝန်ရှိသူတွေက သူတို့ကို လမ်းပန်းခရိုင်ရှိ ဆင်ကုသရေးစခန်းမှာ ခေါ်ဆောင်လာပြီး စစ်ဆေးနေတယ်လို့ ဆိုပါတယ်။ 

သေဆုံးနေတဲ့ ဆင်မကြီးကို သယ်ယူစဉ်မှာ ဆင်ကလေးက မိခင်ကို အသယ်မခံဘဲ အော်ဟစ်နေကြောင်း၊ တာဝန်ရှိသူတွေ မရောက်ခင်ကလည်း အမေနားက လုံးဝမခွာဘဲ သေဆုံးနေတဲ့ ဆင်ကြီးကို အစွယ်နဲ့ပွတ်သပ်နေလို့ မြင်သူတိုင်း ရင်ဆို့နင့်စေ‌ခဲ့တယ်လို့ ရွာသားတွေက ပြောပါတယ်။