Tiffany 2020 အလှဘုရင်မ ဆုရထားတဲ့ ထိုင်း LGBT အလှမယ်  လော့ခ်  (ခ)  ခွမ်ရဒါးရုန့်လွတ်အမ်းဖားဟာ သူငယ်ချင်းတွေနဲ့အတူ အမျိုးသမီးလို တက္ကသိုလ်ကျောင်းသူ ဝတ်စုံ ဝတ်ဆင်ပြီး ဘွဲ့ယူခွင့်ရရှိခဲ့ပါတယ်။

ထိုင်းနိုင်ငံမှာ ဘွဲ့ယူတဲ့အခါမှာ မိမိအမျိုးသားမှတ်ပုံတင်အမည်ပါ မူရင်းလိင်အတိုင်းသာ ဝတ်စားဆင်ယင်ရမယ်လို့ သတ်မှတ်ထားတာဖြစ်ပြီး အခုတော့ ပထမဆုံးအကြိမ် အမျိုးသမီးလို ဝတ်ဆင်ပြီး ဘွဲ့ယူခွင့်ရခဲ့တာပါ။

ခေတ်စနစ်တွေ ပြောင်းလာတာနဲ့အမျှ  အဆိုပါစည်းကမ်းကို ဖျက်သိမ်းပေးဖို့၊  လိင်ခွဲခြား ဆက်ဆံမှုမရှိရေး၊ ကျားမတန်းတူရေး၊ ဘယ်သူမဆို မိမိဖြစ်တည်လိုတဲ့ လိင်အတိုင်း ဝတ်စားဆင်ယင်ကာ ဘွဲ့ယူခွင့်ရဖို့ လူ့အခွင့်အရေးလှုပ်ရှားသူတွေ၊ လိင်ပြောင်းလဲသူတွေက တောင်းဆိုခဲ့ကြတာပါ။

ဒီကိစ္စကို ထိုင်းလူမှုအသိုင်းအဝိုင်းမှာ တချို့က လက်ခံနိုင်သလို တချို့က လက်မခံနိုင်တာကြောင့် ငြင်းခုံမှုတွေလည်း ရှိနေပါတယ်။

Tiffany 2020 အလှဘုရင်မ ဆုရထားသူ လော့ခ် (ခ)  ခွမ်ရဒါးရုန့်လွတ်အမ်းဖားကတော့ သူငယ်ချင်းတွေနဲ့အတူ အမျိုးသမီးလို ဝတ်ဆင်ပြီး ဘွဲ့ယူတဲ့ ဓာတ်ပုံကို တင်ကာ  “လိင်ခွဲခြားမှုမရှိဘဲ ဝတ်စားဆင်ယင်ပြီး ဘွဲ့တက်ယူခွင့်ရဖို့ လျှောက်ထားခဲ့တဲ့အတိုင်း အမျိုးသမီးလို ဝတ်ဆင်ပြီး ဘွဲ့ယူခဲ့ရလို့ အရမ်းကို ဝမ်းသာဂုဏ်ယူမိတယ်”လို့ သူ့ရဲ့ အင်စတာဂရမ်မှာ ရေးသားလိုက်ပါတယ်။

သူတို့ဟာ အနုပညာတိုးတက်မြှင့်တင်ရေးဌာနရဲ့ ခွင့်ပြုချက်နဲ့ မိမိဖြစ်တည်လိုသော လိင်အမျိုးအစားအလိုက် ဝတ်စားဆင်ယင်ပြီး ဘွဲ့ယူခဲ့တဲ့ ပထမဆုံးအသုတ် ပထမဆုံးအကြိမ် ဖြစ်တယ်လို့ ဆိုပါတယ်။

ဒါဟာ လူ့အခွင့်အရေးမြှင့်တင်ရေး၊ တန်းတူညီမျှရေးနဲ့ လိင်အလိုက် ဝတ်စားဆင်ယင်မှုပေါ် မူတည်ပြီး ခွဲခြားမှုအမျိုးမျိုး ပပျောက်ရေးအတွက် အရေးကြီးတဲ့ ပထမဆုံးခြေလှမ်း၊ ပထမဆုံးအကြိမ် ဖြစ်တယ်လို့ လော့ခ်က ပြောပါတယ်။

Photo- Matichon