အာဆီယံခေါင်းဆောင်တွေကြား ပြီးခဲ့တဲ့နှစ် ဧပြီ ၂၄ ရက်က အတည်ပြုခဲ့တဲ့ ဘုံသဘောတူညီချက်  ၅ ချက်ကို အကောင်အထည်ဖော်ဆောင်ရွက်ဖို့ မြန်မာအာဏာသိမ်း စစ်ခေါင်းဆောင်တွေဘက်က ပျက်ကွက်နေတဲ့အပေါ်  ပြင်သစ်အစိုးရက ပြစ်တင်ရှုတ်ချလိုက်ပါတယ်။ 

မြန်မာ့နိုင်ငံရေးအကျပ်အတည်း ပြေလည်ဖို့ ကြိုးပမ်းနေတဲ့ အာဆီယံအသင်းဝင်တွေရဲ့ ဆောင်ရွက်ချက်ကို ပြင်သစ်နိုင်ငံအနေနဲ့ ဆက်လက် ထောက်ခံနေပြီး တဘက်မှာလည်း မြန်မာစစ်ခေါင်းဆောင်တွေဘက်က အာဆီယံဘုံ သဘောတူညီချက်၅ ချက်ကို ဆောင်ရွက်ဖို့ ပျက်ကွက်နေတာကို ပြစ်တင်ရှုတ်ချလိုက်တာလို့  ပြင်သစ်နိုင်ငံခြားရေးဝန်ကြီးဌာနက ဧပြီ ၂၄ ရက်နေ့စွဲနဲ့ ကြေညာပါတယ်။ 

ဒါ့အပြင် စစ်တပ်က အကြမ်းဖက်နေတာတွေ ချက်ချင်းရပ်ဖို့၊ လူသားချင်းစာနာမှုအကူအညီပေးခွင့် မရအောင် ပိတ်ဆို့ထားတာတွေ ဖယ်ရှားဖို့၊ NUG အစိုးရ အပါအဝင် ပြည်သူ့လွှတ်တော်ကိုယ်စားပြုကော်မတီ CRPH နဲ့ ဒီမိုကရက်တစ်အင်အားစုတွေနဲ့ နိုင်ငံရေးဆွေးနွေးဖို့ ထပ်မံတောင်းဆိုလိုက်ပါတယ်။

ဒီမိုကရေစီရေးအတွက် မမောတမ်းကြိုးပမ်းနေတဲ့ မြန်မာပြည်သူတွေရဲ့ အဖိနှိပ်ခံရမှုတွေ၊ ဒုက္ခတွေ၊ ရဲရင့်ပြတ်သားမှုတွေကိုလည်း ချီးကျူး ထောက်ခံတယ်လို့လည်း ပြင်သစ်အစိုးရက ဆိုထားပါတယ်။ 

မြန်မာနိုင်ငံမှာ နိုင်ငံရေးနဲ့ လူသားချင်းစာနာထောက်ထားမှုဆိုင်ရာ အခြေအနေတွေကို ဖြေရှင်းရာမှာ ဘာတိုးတက်မှုမှ မတွေ့ခဲ့ရလို့ အာဆီယံသဘောတူညီမှုအပေါ် စိတ်ပျက်ရကြောင်း   အာဆီယံလူ့အခွင့်အရေးဆိုင်ရာ ပါလီမန်အမတ်တွေ APHR အဖွဲ့ကလည်း ဆိုထားပါတယ်။

၂၀၂၁ ခုနှစ် ဧပြီ ၂၄ ရက်က ဂျကာတာမှာ ကျင်းပခဲ့တဲ့ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကိုယ်တိုင်တက်ရောက်ခဲ့တဲ့  အာဆီယံ ခေါင်းဆောင်များ အစည်းအဝေးကနေ ဘုံသဘောတူညီချက် ၅ ချက်ကို ချမှတ်ခဲ့တာပါ။

သဘောတူညီမှုထဲမှာ မြန်မာနိုင်ငံမှာ အကြမ်းဖက်မှုတွေ ရပ်တန့်ရေး၊ ပြည်သူတွေရဲ့ အကျိုးစီးပွားအတွက် ငြိမ်းချမ်းတဲ့အဖြေရှာဖို့ သက်ဆိုင်ရာ အင်အားစုအားလုံးအကြား အပြုသဘောဆောင်တဲ့ တွေ့ဆုံဆွေးနွေးရေး၊ အာဆီယံအတွင်းရေးမှူးချုပ်ရဲ့အကူအညီနဲ့ အာဆီယံဥက္ကဋ္ဌရဲ့အထူးသံတမန်က ကြားဝင်ဖျန်ဖြေပေးရေး၊ အာဆီယံရဲ့ AHA Centre မှ လူသားချင်းစာနာမှုအကူအညီနဲ့ သက်ဆိုင်ရာ ကဏ္ဍအသီးသီးနဲ့တွေ့ဆုံဖို့ မြန်မာနိုင်ငံကို အာဆီယံအထူးသံတမန်နဲ့ ကိုယ်စားလှယ်အဖွဲ့ လာရောက်ရေးတို့ကို အာဆီယံခေါင်းဆောင်တွေက တောင်းဆိုထားတာဖြစ်ပြီး တနှစ်ကျော်ကြာလာတဲ့အထိ မြန်မာစစ်ကောင်စီက တခုမှ လိုက်နာ လုပ်ဆောင်တာ မရှိသေးပါဘူး။