ထိုင်းနိုင်ငံမှာ ကိုဗစ်- ၁၉ ကူးစက်ရောဂါကြောင့် ၂ နှစ်ကျော်ပိတ်ထားခဲ့ရတဲ့ အိမ်နီးချင်း ၄ နိုင်ငံက နယ်စပ်တံခါးပေါက်တွေကို လာမယ့် မေလ ၁ ရက်နေ့မှာ ပြန်ဖွင့်တော့မယ်လို့ ထိုင်းနိုင်ငံ ကိုဗစ်- ၁၉ အခြေအနေကွပ်ကဲထိန်းချုပ်ရေးဗဟိုကော်မတီက ဧပြီ ၂၈ ရက် သတင်းစာရှင်းပွဲမှာ ပြောပါတယ်။ 

ပြန်ဖွင့်မယ့် နယ်စပ်တံခါးပေါက် စုစုပေါင်း ၁၇ ခုရှိကြောင်း ၊ အဲဒါတွေကတော့  လာအိုနိုင်ငံနယ်စပ် လွေး ၊ နခွန်းဖနုန် ၊ နောင်ခိုင်၊ မုဒ်တာဟန်၊ ဘင်ကန် ၊ ဆူရင်း ၊ ဆီစကစ် ကမ္ဘောဒီးယားနယ်စပ် ဆာကယောက် ၊ ကျန်ထပူရီ ၊ တလာတ်  မြန်မာနယ်စပ် တာ့ခ်  (မဲဆောက်) ၊ ကန်ကျနပူရီ၊ ရနောင်း နဲ့ မလေးရှားနယ်စပ် ဆုန်ခလာ ၊ နာရာသီဝပ်၊ ယလား ၊ ဆဒွန်းစတဲ့ခရိုင်က ဝင်ပေါက်တွေလို့  ထိုင်းနိုင်ငံ ကိုဗစ်-၁၉ အခြေအနေကွပ်ကဲထိန်းချုပ်ရေးဗဟိုကော်မတီ ဒုပြောခွင့်ရ ဒေါက်တာ ဆုမဏီး ဝပ်ချရဆင်က ပြောပါတယ်။ 

နယ်စပ်တံခါးပေါက်မှာ ဝင်ရောက်လာမယ့်သူတွေထဲ ထိုင်းနိုင်ငံသားနဲ့ နိုင်ငံခြားသား ၂ မျိုးရှိကြောင်း ၊ ထိုင်းနိုင်ငံသားဆိုရင် ကျန်းမာရေးအာမခံကတ်ပြရန်မလိုပေမဲ့ ကိုဗစ်-၁၉ ကာကွယ်ဆေး ၃ ကြိမ်ထိုးပြီးသား အထောက်အထားပြရမှာဖြစ်ကြောင်း ၊ မပြနိုင်က RT/PCR စစ်ဆေးခံရမှာဖြစ်ပြီး ကွာရန်တင်းဝင်ရမှာဖြစ်ပါတယ်။ 

နိုင်ငံခြားသားတွေမှာ ပတ်စ်ပို့ကိုင်ဆောင်သူတွေအနေနဲ့ Thai Pass အထောက်အထား ၊ ကိုဗစ်- ၁၉ ကာကွယ်ဆေးထိုးပြီးထောက်ခံစာနဲ့ ကျန်းမာရေးအာမခံကတ် ပြရမှာဖြစ်ပါတယ်။ 

ပိတ်စ်ပို့ စာအုပ်ကြီးမဟုတ်ဘဲ နယ်စပ်ဖြတ်လက်မှတ် ( Border Pass) ကိုင်ဆောင်သူတွေမှာ ကာကွယ်ဆေး ၃ ကြိမ်ထိုးပြီးအထောက်အထားပြဖို့လိုပြီး  ကျန်းမာရေးအာမခံကတ် မလိုအပ်ဘူးလို့ ဆိုပါတယ်။ ကာကွယ်ဆေးမထိုးရသေးပါက RT-PCR စစ်ဆေးခံရမှာဖြစ်ပါတယ်။ 

နိုင်ငံတကာလေဆိပ်တွေမှာ  မေ ၁ ရက်ကစလို့  Test & Go စနစ်ကို ဖျက်သိမ်းပေမယ့် Thailand Pass ကြိုတင်မှတ်ပုံတင်ခြင်းကိုတော့ ပြုလုပ်ရမှာဖြစ်ကြောင်း ၊ RT-PCR စစ်ဆေးတာနဲ့ ကွာရန်တင်းဝင်မယ့်ဟိုတယ်ခန်းကြိုတင်ငှါးထားတဲ့အထောက်အထားပြသခြင်းကို ရုပ်သိမ်းပြီး ကာကွယ်ဆေးထိုးပြီးသားအထောက်အထေားနဲ့ ကျန်းမာရေးအာမခံကတ်ပြသဖို့သာ လိုအပ်တော့ မယ်လို့  ဒေါက်တာ ဆုမဏီးက ပြောသွားပါတယ်။ 

ကိုးကား - prachachat.net